Ғарбий Африкада жойлашган Гвинея-Бисауда давлат тўнтаришига уриниш муваффақиятсиз кечди. Тартибсизликлар оқибатида камида 11 киши ҳалок бўлган. Бу ҳақда мамлакатнинг туризм вазири ва ҳукумат вакили Фернандо Ваш матбуот анжуманида маълум қилди.
Вазирнинг сўзларига кўра, мамлакат пойтахти Бисаудаги ҳодиса қурбонлари орасида тинч аҳоли, аскарлар ва хавфсизлик кучларининг ходимлари ҳам бор. У давлат тўнтариши иштирокчиларини «мамлакатда тартибсизлик яратишга» уринганликда қоралаб, расмийлар томонидан ҳар томонлама текширув ўтказилишига ваъда берди.
Шунингдек, Ваш мудофаа ва хавфсизлик кучлари конституциявий тузумни қўллаб-қувватлаш учун жасорат ва қатъият кўрсатиб, тўнтаришни тўхтатишда муҳим рол ўйнаганини алоҳида тилга олди.
Гвинея-Бисау 3 февраль куни президент Умар Шисоку Эмбало ва бош вазир Нуно Набиама иштирокида учрашув бўлиб ўтаётган пайтда ҳукумат биноси яқинида кучли отишма овозлари эшитилган.
Кейинчалик Эмбало матбуот анжуманида давлат тўнтаришига уриниш унинг гиёҳванд моддалар савдосига қарши кураши билан боғлиқлигини, бир неча киши ҳибсга олинганини айтган.
Январь охирида Африканинг яна бир давлати Буркина-Фасода давлат тўнтариши содир бўлганди. Мамлакат президенти Рок Марк Каборе ҳарбийлар томонидан ҳибсга олинган ва армия базаларидан бирига жойлаштирилган. Унинг оиласи мамлакатни тарк этган.
Изоҳ (0)