Жанубий Африкага ёпирилган Ана тропик циклони юзага келтирган сув тошқинлари оқибатида 70 дан ортиқ одам ҳалок бўлди, деб хабар беради BBC. Шунингдек, яна 130 минг киши ўз уйларини тарк этишга мажбур бўлган.
Кучли ёғингарчилик айрим туманларда циклондан кейин ҳам давом этган. Бу эса ўз навбатида сув тошқинларини юзага келтирган.
Мадагаскарда камида 48 киши ҳалок бўлган, 130 минг киши ўз уйларини тарк этган. Пойтахт Антананаривудаги мактаб ва спорт заллари уйидан кўчишга мажбур бўлган фуқаролар учун бошпанага айланган.
Малавида камида 11 киши ҳалок бўлгани айтилмоқда. Бутун мамлакат бўйлаб электр энергияси таъминоти узилган, айрим туманларда эса табиий офат хавфи эълон қилинган.
Шунингдек, Мозамбикда 18 киши ҳалок бўлгани маълум қилинди. Аммо расмийларнинг сўзларига кўра, қурбонларнинг аниқ сони ҳамон номаълум: сув тошқинлари оқибатида жами 20 минг киши жабр кўрган.
Мозамбик бош вазири Карлос Агостинё ду Росарио халқаро ҳамжамиятларни ёрдамга чақирган. ЮНИСЕФ мамлакатга ўз ходимларини юбориб, мамлакатда гуманитар ёрдамга муҳтож 45 минг кишига кўмак беришини маълум қилган.
Шу билан бирга, минтақадаги метеохизматлар яқин кунларда Ҳинд океанида яна бир бўрон пайдо бўлиши мумкинлигидан огоҳлантирмоқда.
Эслатиб ўтамиз, 2021 йил декабрь бошларида Бразилияда сув тошқини туфайли 7 киши ҳалок бўлган, минглаб одамлар эвакуация қилинган эди. Шунингдек, декабрда Малайзияда йирик сув тошқинлари юз бериб, 25 мингдан ортиқ одам эвакуация қилинган. Январь ўрталарида эса Россиянинг Сахалин вилоятидаги қор циклони совуқ шамоллар ва бўрон олиб келган.
Изоҳ (0)