TJournal’нинг қайд этишича интерьер суратлари суриштирувдаги 3Д-визуализацияга мос келади.
Коррупцияга қарши курашиш фондининг YouTube’даги каналида «Путин саройи» ҳақидаги журналистик суриштирувнинг иккинчи қисми эълон қилинди. Материал саройдан олинган реал суратлар билан тўлдирилган.
Мария Певчих ва Георгий Албуровнинг маълум қилишича, «Путин саройи» ҳақидаги суриштирув эълон қилинганидан кейин Россия федерал каналларидаги лавҳаларда ушбу ролик мультфильмга қиёсланган, сабаби Навальний интерьернинг ясама нусхасини намойиш қилганди. Энди мухолифатчининг тарафдорлари Геленжикдаги уйнинг реал фотосуратларини эълон қилишди.
Певчих ва Албуровнинг аниқлик киритишича, фотосуратлар эски, ҳозирда сарой деворлари тозалаб қўйилган. Муаллифлар суратлар қачон ва қандай йўл билан олинганини ошкор этмаган.
Коррупцияга қарши кураш фонди 2021 йил 19 январда «Путин учун сарой. Энг катта пора тарихи» фильмини тармоққа юклади. Қаср ҳудудида казино, чилимхона, омбор, ўйин автоматлари ва бошқа кўнгилочар масканлар мавжуд.
«Путин саройи» ижтимоий тармоқларда кескин муҳокамаларга сабаб бўлди. Геленжикдаги сарой ҳақида аввал ҳам кўпчилик билган, аммо қайта тайёрланган интерьер президент диди ва у ёқтирган ҳашамат ҳақида ахборот бермоқда. Путиннинг ўзи «қаср» ҳақидаги фильмда кўрсатилган нарсаларнинг ҳеч бири унга тегишли эмаслигини айтиб, видеога изоҳ берган.
Мазкур фильм 2021 йил якунига кўра, Россияда YouTube’нинг энг оммалашган видеоси деб топилган.
Изоҳ (0)