АҚШнинг БМТдаги доимий ваколатхонаси Шимолий Корея томонидан баллистик ракеталарнинг учирилиши масаласи бўйича БМТ Хавфсизлик кенгаши йиғилишини ўтказиш ташаббуси билан чиқди. Бу ҳақда ташкилотдаги дипломатларга таяниб, «Интерфакс» хабар берди.
Манбаларнинг маълум қилишича, йиғилиш 19 январь куни ёпиқ эшиклар ортида бўлиб ўтиши мумкин.
АҚШнинг мазкур ташаббусини Албания, Буюк Британия, Франция, Ирландия ва Мексика қўллаб-қувватлаган.
Аввалроқ АҚШнинг БМТдаги доимий вакили Линда Томас-Гринфилд The Washington Post’га берган интервьюсида Вашингтон «Шимолий кореяликларга босим ўтказишни давом эттириш» ниятида эканини маълум қилганди. Албания, Буюк Британия, Франция, Ирландия, Япония ва Қўшма Штатлар қўшма баёнот билан Пхеньянни «вазиятни беқарорлаштирувчи ҳаракатлардан тийилишга» чақирганидан сўнг, Шимолий Корея 18 январь куни яна битта ракетани учирган эди.
Январь ўрталарида Шимолий Корея АҚШ Пхеньянга нисбатан янги санкцияларни жорий этгач, «янада кучли ва аниқ жавоб» қайтаришга мажбур бўлиши ҳақида огоҳлантирганди. «Агарда АҚШ шу каби контрфронтал позицияни эгаллашда давом этса, КХДР бунга янада кучли ва аниқ жавоб қайтаришга мажбур бўлади», — дейилади Шимолий Корея ТИВ вакилининг баёнотида.
Эслатиб ўтамиз, Шимолий Корея 2022 йилдаги биринчи ракетасини 5 январь куни, иккинчисини — 11 январда ва учинчисини 14 январда учирган эди.
Изоҳ (0)