Буюк Британия бош вазири Борис Жонсон Англияда омикрон штамми тарқалгани туфайли жорий қилинган чекловлар 26 январдан бошлаб бекор бўлишини маълум қилди, дея хабар берган BBC News.
Жонсон қуйи Палатада нутқ сўзлаб экспертлар фикрича коронавируснинг тарқалиш тўлқини миллий даражада энг юқори чўққига чиққанини таъкидлади.
26 январдан бошлаб Англияда жамоат жойларида тиббий ниқоб тақиб юриш тартиби бекор қилинади ва бу ортиқ мажбурият эмас, балки тавсияга айланади. Шунингдек, тунгги клублар, концертлар ва бошқа оммавий тадбирларда қатнашиш учун COVID-паспортларни кўрсатиш талаби ҳам бекор қилинади. Англия ҳукумати алоҳида тадбирларнинг ташкилотчиларига COVID-паспорт талаби асосида томошабинларни киритиш ёки киритмаслик масъулиятини топширган.
Борис Жонсон ҳукуматнинг аҳолига уйдан ишлашни ортиқ тавсия этмаслиги, шу сабабли ҳам ходимлар иш берувчилар билан офисга қайтиб ишлашни муҳокама қилиб олиши лозимлигини қайд этган. Бундан ташқари 20 январдан бошлаб юқори синф ўқувчилари мактабларда тиббий ниқоб тақишга мажбур бўлмайди.
Бош вазир ҳукуматнинг COVID-19 аниқланган одамларнинг ўзни яккалаш тартибига ўтказиш талаби ҳам олиб ташланишини қўшимча қилган. Унинг сўзларига кўра ҳозирча мазкур талаб ўз кучида қолади, бироқ COVID-19 тарқалишига қараб у ҳам тавсия характерига эга бўлади. Мазкур қоидаларнинг муддати 24 мартда якунига етади.
The Guardian’нинг ёзишича Борис Жонсон коронавирус чекловларининг кўпчилиги бош вазирнинг локдаун вақтида Лондонда Даунинг-стритда жойлашган резиденцияда ўтган базмдаги иштироки ҳақидаги хабарлар туфайли норози бўлган парламент аъзоларини тинчлантириш учун бекор бўлмоқда.
Аввалроқ қуйи палата 2020 йил майда локдаун вақтида резиденция боғида ўтказилган базмни муҳокама қилган. Унда қатнашган Борис Жонсон парламентарийларга буни ишчи тадбир деб ўйлагани ҳақидаги важни айтганди. У коронавиурс қоидаларини бузгани учун узр сўраган.
2021 йил декабрда Буюк Британияда Борис Жонсон девонхонаси ходимларининг 2020 йил декабрда локдаун вақтида Даунинг-стритдаги резиденцияда ўтган рождество базмида қатнашгани ва бир-бирлари билан ҳазил қилаётгани акс этган шовшувли видео тарқалди. Жонсон мазкур видео учун ҳам кечирим сўраган. Ушбу видеоёзувдаги бош вазир аппаратининг ходимаси ишдан бўшаган.
Изоҳ (0)