Туркия президенти Ражаб Тоййиб Эрдўғон Россия ва Украина президентлари Владимир Путин ва Владимир Зеленскийни «ихтилофларни бартараф этиш учун» Туркияга таклиф қилди. Бу ҳақда Эрдўғоннинг расмий вакили Иброҳим Калинга таяниб, Daily Sabah хабар берди.
Калин Circle фонди томонидан ташкиллаштирилган «Россия ва Украина ўртасидаги таранглик: Европа ва НАТО учун қандай хавф бор?» номли онлайн вебинарда нутқ сўзлаган.
«Туркия Россия ва Украина ўртасидаги тарангликни камайтириш учун ҳар қандай ҳаракатга тайёр», — деди Калин.
Унга кўра, Эрдўғон Путин билан ҳам, Зеленский билан ҳам гаплашди. «У ҳатто икки етакчини агар юзма-юз учрашиб, муаммолар ва келишмовчиликларини ҳал қилмоқчи бўлса, Туркияга келишни таклиф қилди», — деди Эрдўғоннинг матбуот котиби. У, шунингдек, Эрдўғон яқин бир неча ҳафта ичида Зеленский билан музокаралар ўтказиш учун Украинага боришини маълум қилди.
«Туркия буни нафақат Россия ва Украинага дўст давлат сифатида, балки НАТО иттифоқчиси сифатида ҳам амалга оширади», — таъкидлади Калин.
«ТАСС» хабарига кўра, Кремль таклифни рад этган. Россия президентининг матбуот котиби Дмитрий Песков Эрдўғоннинг таклифига шундай фикр билдирган:
«Украинадаги вазиятни тартибга солишга ёрдам бера оладиган ҳар қандай давлатнинг саъй-ҳаракатларини шубҳасиз қўллаб-қувватлаймиз. Россия ва Украина ўртасидаги асосий келишмовчиликлар айнан Киевнинг Минск келишувларини бажаришни тўхтатиб қўйгани билан боғлиқ. Агар туркиялик ҳамкорларимиз украиналикларга таъсир ўтказа олса, уларни аввалроқ тузилган келишув ва мажбуриятларни бажаришга ундаса, буни фақат олқишлаш мумкин», — деди у.
«Айрим мулоқотларнинг қаерда ўтказилиши — иккинчи даражали. Асосийси — якунда Украинага таъсир ўтказиш», — дея қўшимча қилди Песков.
Бу Эрдўғоннинг Россия ва Украина муносабатларида воситачилик қилиш ҳақидаги биринчи таклифи эмас. 2021 йилнинг ноябрида у Туркия Россия ва Украина ўртасидаги зиддиятни юмшатишда воситачи бўлишга тайёрлигини маълум қилганди. Шундан сўнг Эрдўғон Туркия инқирозни Путин билан муҳокама қилаётганини ва зиддиятнинг ҳар икки томони билан музокараларни давом эттириш ниятида эканини таъкидлаган.Аввал ҳам Песков Донбасс бўйича Россия, Украина ва Туркия етакчилари иштирокида саммит ўтказиш мантиққа тўғри келмаслигини, чунки Москва зиддият тарафи эмаслигини айтган. Песковнинг сўзларига кўра, қарама-қарши томонлар Киев ва ўзини республика эълон қилган Донецк ва Луганск халқ республикалари вакилларидир.
Изоҳ (0)