Афғонистон ғарбидаги Бадғис вилоятида содир бўлган зилзила оқибатида 22 киши ҳалок бўлди. Бу ҳақда «Бахтар» давлат ахборот агентлигига таяниб, «Интерфакс» хабар берди.
«Бугунги зилзила оқибатида Бадғис вилоятида 22 киши ҳалок бўлди ва 4 киши жароҳат олди. Қурбонларнинг аксарияти Кадис уеъздида яшаган», — дейилади хабарда.
Расмийларнинг сўзларига кўра, бу ҳозирча дастлабки маълумотлар бўлиб, у ўзгариши мумкин.
АҚШ Геология хизматининг маълум қилишича, 17 январь куни маҳаллий вақт билан соат 16:10 да магнитудаси 5,6 баллга тенг ер ости силкинишлари кузатилган. Зилзила эпимаркази Қалъайи-Нав шаҳридан 40 километр шарқда, Бағдис вилоятининг маъмурий маркази ва Туркманистондан 70 километр жануби-шарқда жойлашган. Зилзила 10 километр чуқурликда қайд этилган.
Аввалроқ Кипр қирғоқларида кучли зилзила қайд этилгани, шунингдек, зилзила оқибатида Буюк Хитой деворининг бир қисми қулаб тушгани, Японияда зилзиладан кейин Иккинчи жаҳон уруши давридаги кемалар сув юзасига қалқиб чиққани, Покистонда юз берган зилзила оқибатида 20 киши ҳалок бўлгани тўғрисида хабар берилганди.
Изоҳ (0)