Kipr qirg‘oqlarida kuchli zilzila qayd etildi

Kipr qirg‘oqlarida magnitudasi 6,6 ballga teng zilzila sodir bo‘ldi. Bu haqda AQSh Geologiya xizmatiga (USGS) tayanib, “RIA Novosti” xabar berdi.

Yerosti silkinishlari Toshkent vaqti bilan soat 06:07 da qayd etilgan bo‘lib, uning o‘chog‘i 19,6 kilometr chuqurlikda joylashgan. Zilzila epimarkazi Limasol shahridan 115 kilometr shimoli-g‘arbda.

Yevropa—O‘rta Yer dengizi seysmologiya markazi (EMSC) ma’lumotlariga ko‘ra, zilzila magnitudasi 6,5 ballni tashkil etgan, o‘chog‘i esa 51 kilometr chuqurlikda joylashgan.

Halok bo‘lganlar va vayronalar haqida ma’lumot kelib tushmagan. Sunami xavfi e’lon qilinmagan.

Avvalroq Zilzila oqibatida Buyuk Xitoy devorining bir qismi qulab tushgani, Yaponiyada zilziladan keyin Ikkinchi jahon urushi davridagi kemalar suv yuzasiga qalqib chiqqani, Pokistonda yuz bergan zilzila oqibatida 20 kishi halok bo‘lgani to‘g‘risida xabar berilgandi.