Moderna бир неча ҳафта ичида омикронга қарши вакцинанинг клиник синовларини бошлайди

АҚШнинг Moderna фармацевтик компанияси коронавируснинг омикрон штаммига қарши вакцина синовларини яқин ҳафталарда бошлашини эълон қилди. Бу ҳақда компания раҳбари Стефан Бенселга таяниб, «Интерфакс» хабар берди.

«Вакцинани ишлаб чиқиш жараёни якунига етмоқда. Яқин ҳафталар ичида вакцина клиник синовлардан ўтказилади. Ваколатли идоралардан зарур маълумотлар олинганидан сўнг март ойида кейинги қадамлар борасида бир қарорга келиш мумкин бўлади», – деган Бансел Давосда ўтган Бутунжаҳон иқтисодий форуми доирасидаги конференцияда.

Бундан ташқари, Moderna раҳбари компаниянинг асосий мақсади ҳар йили COVID-19 ҳамда гриппга қарши турадиган бустер ишлаб чиқиш эканлигини билдирди.

«Шу тариқа одамларда ҳар йили қишда икки ёки учта вакцина дозасини олиш зарурати бўлмайди, улар битта бустер қабул қилиб, ҳам коронавирусдан ҳам гриппдан ҳимояланади», – дея таъкидлаган Бансел.

Унинг сўзларига кўра, бундай бустер ҳаммаси яхши кетса, 2023 йил кузида тайёр бўлиши ва бир нечта давлатда ишлатилиши мумкин.

ОАВда кўплаб мамлакатларда кекса одамлар ва иммун тизими заиф аҳоли қатламига коронавирусга қарши учинчи вакцина билан эмланиш таклиф қилинаётгани ҳақида хабарлар тарқалган. Шунингдек, Исроилда ва Чилида аҳолига тўртинчи вакцина билан эмланиш таклифлари берилган. Жумладан, Венгрияда коронавирусга қарши вакцинанинг тўртинчи дозаси билан эмланишга рухсат этилганди.

Аввалроқ Бансел 2022 йил кузида одамлар вакцинанинг тўртинчи дозасини ҳам олишига тўғри келиши, сабаби бустер вакцина учинчи дозасининг кучи бир неча ойда кетиши ҳақида гапирганди. Европа ваколатли идораси расмийлари вакцинанинг тўртинчи дозаси заруратга айланиши ҳақидаги мазкур баёнот борасида шубҳалари борлигини қайд этган.

Ўз навбатида АҚШда юқумли касалликлар борасида етакчи мутахассис Энтони Фаучи Давосдаги виртуал форумда бустер вакцинанинг тўртинчи дозаси иммун тизимига салбий таъсир кўрсатиши хусусида маълумотлар йўқлигини айтган.

Pfizer директори Алберт Бурла одамлар коронавирусга қарши мазкур компания вакцинасининг учинчи дозасини олишлари зарурлиги, сабаби мазкур препарат коронавирус инфекциясидан ишончли ҳимояни таъминлашини таъкидлаганди.

«Кейинчалик йилига биттадан доза билан эмланадиган вакциналарга ўтилади, фақат иммунитети паст инсонларга ҳар чоракда бир марта эмланиш тавсия қилинади. Шу билан бирга болаларни касалликдан ҳимоялаш учун ҳам уларни вакцинация қилиш керак. Болалар билан боғлиқ ҳолатлар вакцинанинг самарадорлиги жуда юқори», – деган Pfizer раҳбари.