Инсоният кейинги пандемияга тайёрланиши керак. Бу ҳақда Бирлашган Миллатлар Ташкилоти бош котиби Антониу Гутерриш Жаҳон иқтисодий форумида айтиб ўтди.
«Биз ҳар бир мамлакатда мониторинг, эртароқ аниқлаш ва тезкор чоралар кўриш режаларига сармоя киритиш билан, шунингдек, Жаҳон соғлиқни сақлаш ташкилотига ишончни мустаҳкамлаш орқали кейинги пандемияга тайёргарлик кўришимиз керак», — деди БМТ бош котиби.
Гутерриш, шунингдек, ҳозирги пандемияга қарши тенглик асосида «адолатли ва холис» кураш олиб боришга чақирди.
БМТ раҳбари кузда ЖССТ 2021 йил охиригача дунёнинг барча мамлакатлари аҳолисининг 40 фоизини, 2022 йил ўрталаригача эса 70 фоизини эмлашга қаратилган стратегиясини эълон қилганини эслатди.
«Биз ушбу мақсадлардан анча йироқдамиз», — таъкидлади Гутерриш.
Унинг фикрича, фармацевтика компаниялари ривожланаётган мамлакатларга бирдамлик кўрсатиши, лицензия ва технологияларни улар билан баҳам кўриши зарур. Ана шундагина пандемияга қарши курашиш мумкин бўлади, дея хулоса қилди БМТ раҳбари.
Аввалроқ БМТ бош котиби коронавируснинг омикрон штамми туфайли чегаралар ёпилаётганини танқид қилганди. Унинг фикрича, мамлакатлараро ҳаракатланишга қўйилаётган чекловлар дискриминация хусусиятига эга ва пандемияга қарши курашда самара бермайди.
Декабрь ойида Антониу Гутерришда коронавирус аниқлангани ҳақида хабар берилганди.
Изоҳ (0)