Россия—Беларусь ҳарбийлари ўртасидаги қўшма ўқув машғулотларни 2022 йилнинг февралида ўтказиш режалаштирилмоқда. Бу ҳақда Беларусь мудофаа вазири Виктор Хренинга таяниб, «Интерфакс» хабар берди.
«Беларусь ва Россия Мудофаа вазирлиги қуролли кучларнинг қўшма ўқув машғулотларини ўтказиш ғоясини ишлаб чиқди. Манёврлар февралда бошланади. Беларусь мудофаа идораси раҳбари Виктор Хрениннинг сўзларига кўра, Россия томони билан барча масалалар келишиб олинган, аниқ сана ҳозирда белгиланмоқда», — дейилади «БелТа» давлат агентлиги хабарида.
Беларусь президенти Александр Лукашенко 17 январь куни Минскда ўтказилган йиғилишда қўшма ўқув машғулотлари февралда бошланишини маълум қилган. Шунингдек, унинг сўзларига кўра, Болтиқбўйи давлатлари ва Польшанинг ўн минглаб ҳарбий хизматчилари эътибори Беларусь чегарасига қаратилган.
«Давлат раҳбарининг таъкидлашича, сўнгги маълумотларга қараганда Польша ва Болтиқбўйи давлатларининг 30 мингдан ортиқ ҳарбий хизматчиси, техника ва қуроллари Беларусь чегарасига қаратилган», — дейилади хабарда.
«Бугун биз ушбу ғарбий ва жанубий минтақада, ‘Беларусь балкони’да жиддий ўқув машғулотлари ўтказишимиз кераклигини кўряпмиз», — деган Лукашенко йиғилишда.
Эслатиб ўтамиз, 2021 йилнинг август ойида Афғонистон чегарасида Россия, Тожикистон ва Ўзбекистон ҳарбийлари иштирокидаги ўтказилган машғулотлар ўтказилганди. Ўқув машғулотлари Афғонистондаги вазиятнинг кескинлашуви ва радикал террорчилик гуруҳларининг Марказий Осиё мамлакатлари чегарасида хавф туғдираётгани фонида ўтказилган.
Изоҳ (0)