Жанубий Африка республикасида 16 ёшли ўқувчи мактабда аввалига синфдошини, сўнг ўзини отиб ташлади. Бу ҳақда «Korrespondent.net» хабар берди.
Отишма Гаутенг провинцияси Дейвитон шаҳридаги ўрта мактабда офлайн дарслар қайта бошлангандан бир кун ўтиб содир бўлган. Қурбонларнинг иккаласи ҳам 10-синф ўқувчилари.
Воқеа 12 декабрь куни юз берган, аммо кейинги кунга қадар хабар берилмаган. Ҳозирда полиция отишма сабаблари ва ҳолатларини ўрганмоқда. Вазият билан ишлаш учун мактабга психологлар юборилган.
Декабрь бошида АҚШдаги мактабда 15 ёшли ўқувчи отишма содир этганди. Ҳодисада 3 киши, 14-17 ёшли мактаб ўқувчилари ҳалок бўлган.
18 октябрь куни Россиянинг Перм шаҳри яқинидаги Сарс қишлоғида 12 ёшли ўспирин мактабга ов карабини (қисқа стволли милтиқ) билан келиб, ўт очганди. Ҳодиса дарслар бошланишидан олдин юз берган, унинг натижасида ҳеч ким жабрланмаган. Ҳужумчи қўлга олинган.
Эслатиб ўтамиз, 20 сентябрь куни Перм давлат миллий тадқиқотлар университети талабаси Тимур Бекмансуров олийгоҳ ҳудудига милтиқ билан кириб, йўлида учраган одамга ўқ уза бошлаган. Ҳодиса туфайли талабалар деразалардан ташқарига сакраган. Кўпчилик ўз синфхонасида баррикадалар қуриб ўралиб олган. Ҳужумчи камида 30 марта ўқ узган, тахминларга кўра, ўқлар Ҳуглу 12 калибрли силлиқ стволли қуролдан отилган. Оқибатда олти киши ҳалок бўлиб, 43 киши жабрланган.
Изоҳ (0)