Шимолий Корея АҚШ Пхеньянга нисбатан янги санкцияларни жорий этгач, «янада кучли ва аниқ жавоб» қайтаришга мажбур бўлиши ҳақида огоҳлантирди, деб хабар беради «Интерфакс».
«Агарда АҚШ шу каби контрфронтал позицияни эгаллашни давом этса, КХДР бунга янада кучли ва аниқ жавоб қайтаришга мажбур бўлади», — дейилади Шимолий Корея ТИВ вакилининг баёнотида.
Унинг сўзларига кўра, гипертовушли ракеталарнинг яқинда учирилиши «ўзини ҳимоя қилиш ҳуқуқидан фойдаланиш» бўлган.
«КХДРнинг яқинда намойиш этган янги типдаги қуроли ўзининг миллий мудофаа қобилиятини модернизация қилишнинг бир қисми эди, холос. Ракеталарнинг учирилиши бирор-бир аниқ давлат ёки кучларга қаратилмаган ва қўшни мамлакатлар хавфсизлигига ҳеч қандай зарар етказмаган», — дейилади баёнотда.
ТИВ вакили АҚШнинг ҳаракатини «навбатдаги провокация» деб атаб, Вашингтонни «вазиятни қасддан кескинлаштириш»да айблаган.
«Бу АҚШнинг амалдаги администрацияси дипломатия ва диалог ҳақида бонг ураётганига қарамай, у ҳамон КХДРни изоляция қилиш ва бостириш сиёсатини олиб бормоқда», — дея таъкидланади баёнотда.
Шу билан бирга, АҚШ Шимолий Кореяни провокациялардан тийилишга ва бунинг ўрнига диалогга киришишга чақирган.
«Биз КХДР томонидан баллистик ракеталар учирилишини қоралаймиз. Ушбу ракеталарнинг учирилиши БМТ Хавфсизлик Кенгашининг кўплаб резолюцияларини бузиш ҳисобланади ва қўшни мамлакатлар ҳамда дунё ҳамжамиятига хавф туғдиради», — дейди АҚШ Давлат департаменти вакили.
12 январь куни АҚШ Молия вазирлиги Шимолий Кореяга алоқаси борлиги учун Россия фуқароси ва «Парсек» компаниясига қарши санкцияларни киритди.
Эслатиб ўтамиз, Шимолий Корея 11 январга ўтар кечаси Япон денгизи томон яна бир номаълум снарядни учирганди. Таъкидланишича, Шимолий Корея яна бир ракетани АҚШ, Албания, Буюк Британия, Ирландия, Франция ва Япония БМТга КХДР 5 январь куни баллистик ракетани синовдан ўтказганини қоралаб, мурожаат қилганидан сўнг учирган.
Изоҳ (0)