14 январга ўтар кечаси хакерлар Украина ҳукумати ва алоҳида вазирликлар сайтларига ҳужум уюштирди, деб хабар беради «Украина ҳақиқати». Таъкидланишича, ҳозирда «Дия» давлат хизматлари порталига ҳам кириб бўлмаяпти.
Бир нечта вазирликлар сайтида, жумладан, ТИВ сайтига ҳам хакерлар бир хил — украин, поляк ва рус тилларида ёзилган мурожаатини қолдирган. Унда қайд этилишича, Украинанинг барча аҳолисини шахсий маълумотлари «умумий тармоққа юкланган», компьютердаги маълумот эса «ўчирилмоқда ва уни қайта тиклаб бўлмайди».
«Сизларга оид барча маълумотлар оммага эълон қилинди, қўрқинг ва ёмонроғини кутинг. Бу ўтган, ҳозирги ва келажакдаги ишларингиз учун. Волин учун, ОУН УПА (жанговар қаноти Украина исёнчилар армияси бўлган украиналик миллатчилар ташкилоти), Галиция учун, Полесе учун ва тарихий ерлар учун», — дейилади хабарда.
Таълим вазирлигининг Facebook’даги саҳифасида «глобал ҳужум сабаб» вазирлик сайтидан вақтинча фойдаланиб бўлмаслиги, Украина Хавфсизлик хизмати ва киберполицияси ҳолатни тергов қилаётгани маълум қилинган.
Аввалроқ Шимолий кореялик хакерлар коронавирусга қарши вакцина ишлаб чиқарадиган компанияга киберҳужум уюштиришга урингани, АҚШ DarkSide хакерлар гуруҳининг етакчилари ҳақидаги маълумот учун 10 млн доллар мукофот эълон қилгани тўғрисида хабар берилганди.
Изоҳ (0)