АҚШ Олий суди 13 январь куни президент Жо Байденнинг йирик компания ходимларини мажбурий вакцинация ва тестдан ўтказиш тўғрисидаги фармонини блоклаб қўйди, бироқ соғлиқни сақлаш соҳасидаги маълум ходимларнинг вакцинациясига рухсат берган, деб ёзади Axios.
Хусусан, АҚШ администрациясининг 100 ва ундан ортиқ ходимларга эга корхона ишчиларини мажбурий вакцинациядан ўтказиш ёки ҳар ҳафта ПЗР-тест топшириш борасидаги талаби блокланган.
Судьялар Меҳнат муҳофазаси бошқармаси (ОША) 80 миллиондан ортиқ ишчига тааллуқли бўла оладиган талабни чиқариш ваколатига эга эмас деб топган.
«Конгресс ОШАъга иш билан боғлиқ хавфларни тартибга солиш ваколатини берган бўлсада, у ушбу агентликка аҳоли саломатлигини янада кенгроқ тартибга солиш ваколатини бермаган. Шунчаки 100 дан ортиқ ходими бўлган компанияларда ишлагани учун танланган 84 миллион америкаликни эмлаш талаби, албатта, охирги тоифага киради», — дейилади Олий суд қарорида.
Олий суд, шунингдек, федерал бюджет томонидан молиялаштириладиган муассасалардаги тиббиёт ходимларини вакцинациядан ўтказиш мандатини қўллаб-қувватлаган. Шу билан бирга, АҚШ президенти Жо Байден йирик компаниялар ходимларини мажбурий эмлаш бўйича суд қароридан ҳафсаласи пир бўлганини билдирган.
«Олий суд йирик корхоналар ходимларининг ҳаётини сақлаб қолиш бўйича ҳам илм-фанга, ҳам қонунга асосланган соғлом фикр талабларини блоклашга қарор қилганидан ҳафсалам пир бўлди. Ушбу фавқулодда стандарт иш берувчиларга вакцинацияни ёки ишчиларнинг ҳар ҳафта тест топшириш ва иш жойида ниқобда бўлиш шарти билан эмланишдан бош тортишига рухсат бериш имконини тақдим этарди», — дейилади Байденнинг баёнотида.
Президент компаниялар вакцина ёки тест бўйича ўз талабларини ихтиёрий равишда яратиши учун уларга босим ўтказишга ваъда берган.
«Бизнес етакчиларини, хусусан, Fortune 100 рўйхатидаги компанияларнинг учдан бир қисмини зудлик билан олдинга қадам ташлаганларга қўшилишга ҳамда ўз ходимлари, мижозлари ва жамият ҳимояси учун вакцинация талабини жорий этишга чақираман», — дея қўшимча қилади Байден.
Оқ уй матбуот котиби Жен Псаки эса тиббиёт ходимларининг мажбурий вакцинациясини «яхши янгилик» деб атаган.
Эслатиб ўтамиз, 1 ноябрь куни Нью-Йорк шаҳрида 10 000 дан ортиқ полиция, ўт ўчирувчилар ва бошқа ходимлар шаҳар мерининг барча шаҳар ишчиларини COVID-19 га қарши эмлаш бўйича топшириғига риоя қилмагани учун ҳақ тўланмайдиган таътилга жўнатилганди. Нью-Йоркдаги 2,3 мингга яқин ўт ўчирувчи эмланишни истамаётгани учун касаллик таътилига чиққан. Ходимлар етишмовчилиги туфайли шаҳардаги 18 та ўт ўчириш станцияси ёпилган.
Изоҳ (0)