Германияда Telegram маҳаллий қонунларни бузгани учун блокланиши мумкин

Германия Ички ишлар вазирлиги раҳбари Нэнси Фезер мамлакатда Telegram мессенжери блокланиши мумкинлиги ҳақида огоҳлантирди. Бу ҳақда Reuters хабар берди.

Германия ИИВ раҳбарининг айтишича, агар компания мамлакат қонунчилигини менсимасликда давом этса, ушбу чорани қўллашга тўғри келади. Хусусан, гап Telegram платформасидаги экстремистик баёнотлар, коронавирусга қарши эмланиш ва карантинни бойкот қилишга чақирувлар ҳақида кетмоқда.

«Биз ҳуқуқий давлатмиз, лекин принципиал жиҳатдан бундай имкониятни инкор эта олмаймиз. Ўчириш жуда оғир оқибатларга олиб келади ва, албатта, сўнгги чора бўлади. Ундан олдин қолган барча вариантлардан фойдаланиб бўлиниши керак», — деди Фезер.

Унинг сўзларига кўра, Германия Европа Иттифоқидаги ҳамкорлари билан Telegram’ни қандай тартибга солишни муҳокама қилмоқда.

«Telegram’нинг базаси бугун Дубайда, эртага у эҳтимол, Кайман оролларида жойлашган бўлиши мумкин. Ҳуқуқий жиҳатдан тартибга солиш учун бизга катта куч керак бўлади. Германия бу ишни ёлғиз ҳал қила олмайди», — деди у.

Бироқ Германия ИИВ вакили Telegram’ни амалда қандай қилиб блоклаш мумкинлиги ҳақидаги саволга жавобан ҳеч қандай техник ёки ҳуқуқий тафсилот бермаган.