Қозоғистоннинг биринчи президенти, миллат етакчиси Нурсултон Назарбоевнинг кенжа қизи Алия Назарбоева отасини маънавий қўллаб-қувватлагани учун юртдошларига миннатдорлик билдирди. Унинг сўзларига кўра, шу кунларда қозоғистонликлардан кўплаб хатлар келмоқда.
«Сиздан келаётган руҳлантирувчи сўзлар учун раҳмат. Отамни маънавий қўллаб-қувватлаётганингиздан миннатдорман, у бугунги кунда турли вилоятлар аҳолисидан кўплаб хатлар олмоқда», — деб ёзган Алия Назарбоева Instagram’да.
У сўнгги фожиали воқеаларни қабул қилиш қийин эканини айтиб, тинчлик даврида одамларнинг бу тарздаги ўлимини нотўғри деб билишини қўшимча қилган.
«Жабрланганлар ва қурбонлар туфайли ҳис қилинадиган оғриқ ва афсусларни сўз билан ифодалашнинг иложи йўқ. Мен барча қурбонларнинг оила аъзоларига самимий ҳамдардлик билдираман. Барчамиз учун бу аянчли сабоқ тарихимизда сўнггиси бўлиб қолсин», — деб ёзади у.
Қозоғистонда январь бошида кузатилган оммавий норозилик ва тартибсизликлар даврида мамлакат президенти Қосим-Жўмарт Тўқаев Назарбоевнинг ўрнига Хавфсизлик кенгашига раҳбарлик қилишни бошлади. Қонунга кўра, Назарбоев умрининг охиригача мазкур лавозим ваколатларига эга эди. ОАВда биринчи президент оиласи билан хорижга жўнаб кетгани, унинг жияни, Қозоғистон Миллий хавфсизлик қўмитаси раисининг биринчи ўринбосари Самат Абиш ҳибсга олингани ҳақида хабарлар тарқалди.
Кейинроқ миллат етакчисининг матбуот котиби Айдос Укибай Назарбоев Нур-Султонда экани, Тўқаев билан мунтазам алоқада бўлиб тургани ва Хавфсизлик кенгаши раҳбари лавозимини ўз ихтиёри билан топширгани ҳақида баёнот берди. 12 январь куни Қозоғистоннинг Бокудаги элчиси Сержан Абдикаримов ҳам Назарбоев пойтахтда эканини маълум қилди.
Аввалроқ Назарбоевнинг тўнғич қизи, сенатнинг собиқ раиси Дариға коронавирусга чалингани ҳақида хабар берилганди.
Изоҳ (0)