Муборакнинг «Машъал» футбол клубига янги бош мураббий тайинланди.
«Газчилар» матбуот хизматининг ёзишича, клуб раҳбарияти тавсияси ва жамоатчиликнинг фикрига кўра Дилявер Ваниев жамоа бош мураббийи этиб тайинланган.
10 январь куни «Машъал»ни ўтган мавсумда бошқарган Александр Хомяковнинг ўз аризасига биноан лавозимидан озод этилгани тўғрисида хабар берилганди.
Маълумот учун, Ваниев футболчилик фаолияти давомида «Янгиер», «Зарафшон», «Навбаҳор», «Андижон» ва «Машъал» жамоаларида тўп сурган. Мураббийлик фаолиятини ҳам «Машъал»да бошлаган 47 ёшли мутахассис ўтган мавсумда Хомяковга ёрдамчилик қилганди.
Шунингдек, клуб барча легионерлар билан хайрлашилганини маълум қилди. 2021 йилда жамоа сафида ҳаракат қилган нигериялик Оквара Гудвин Чика, Самюэль Онониву, Ифиани Ифиани ва Иби Окоро билан ҳамкорлик тўхтатилган.
«Машъал» Суперлиганинг 2021 йилги мавсумини 12-ўринда якунлади. Жамоа ўтиш ўйинида Про-Лигада 3-ўринни эгаллаган «Олимпик»ка 1:3 ҳисобида ютқазиб, қуйи лигага равона бўлди.
Изоҳ (0)