«Бавария» ва Роберт Левандовски янги шартнома борасида келиша олмаяпти

«Бавария» фахрий футболчилари билан янги шартнома борасида музокара ўтказмоқда.

Мануэль Нойер, Томас Мюллер ва Роберт Левандовскининг Мюнхен жамоаси билан шартномаси 2023 йилнинг ёзида ўз ниҳоясига етади. Жамоа сиёсатига кўра, 30 ёшдан ошган футболчиларга бир йиллик шартнома таклиф қилинади.

Нойер ва Мюллер ушбу шартларга рози. Иккала футболчи ҳам жамоасини алмаштиришни хоҳламайди ва фаолиятини «Бавария»да якунлаш истагида. Левандовски эса клубдан маоши қисқармаган ҳолда узоқ йиллик шартнома хоҳламоқда. Аммо раҳбарият польшалик футболчининг ёшини ҳисобга олиб (Роберт 33 ёшда), маоши қисқармаган узоқ йиллик шартнома таклиф қилиш таваккалчилик деб ҳисобламоқда.

Жорий мавсумда 35 ёшли Нойер «Бавария» сафида барча мусобақаларда 25 та ўйинда иштирок этиб, ўз дарвозасидан 25 та тўп олиб чиқди. 32 ёшли Мюллер 27 та ўйинда қатнашиб, 8 тадан гол ва голли узатмани ўз ҳисобига ёздириб қўйди. Левандовски эса 26 ўйинда 31 та гол урди.