Туркманистон президенти Гурбангули Бердимуҳамедов 10 январь куни 2022 йилдаги биринчи ишчи йиғилишини ўтказди, деб хабар беради «Хроника Туркменистана».
Ашхобод ҳокими Раҳим Гандимов пойтахт тозалигини сақлаш ва ободонлаштириш бўйича, шунингдек, ёритиш тизимининг тўғри ишлашини таъминлаш бўйича ҳисобот берган. Қурилиш, саноат ва энергетика комплексларига масъул бўлган бош вазир ўринбосари Чоримират Пурчеков шаҳарда узлуксиз энергия, газ ва сув таъминотини таъминлаш бўйича хизматлар, шунингдек, 2022 йилга мўлжалланган турли объектларни қуришга тайёргарлик кўрилаётгани ҳақида маълумот берган.
Давлат раҳбари шаҳарни лойиҳалаш ва ёритишда илғор тажриба ва энг янги технологияларни қўллаш, 2022 йилда қурилиши режалаштирилган объектлардаги ишларни белгиланган муддатда якунлаш бўйича топшириқлар берган.
Таъкидланишича, Бердимуҳамедов пойтахтни ёритиш тизими бўйича 2021 йилнинг октябрида Ўзбекистондан қайтганидан сўнг кўпроқ эътибор қарата бошлаган. Давлат раҳбари Ашхобод аэропортида «аэропорт ва унинг атрофини ёритишнинг ўзига хос хусусиятлари»га эътибор қаратган ва Пурчековга «шаҳарнинг ҳар бир бурчагини, хусусан, турли мақсадлардаги объектлар ёритиш тизимлари билан жиҳозлаш» топшириғини берган, чунки «пойтахтнинг ўзига хос дизайн элементи тунги ёруғлик бўлиб, унга ўзгача жозиба бағишлайди».
Таълим вазири Гурбангул Атаева мактабларга қишки таътил якунланганидан кейинги машғулотларга тайёрлигини ва мактаб ҳамда боғчалар иситиш тизимлари билан таъминланганини маълум қилган. Иккинчи ўқув йилини бошлашга тайёргарлик тўғрисида, шунингдек, илк-фан ва таълим, соғлиқни сақлаш ва спорт йўналишига масъул бош вазир ўринбосари Сапардурди Тойлиев ҳам ҳисобот берган.
Туркманистонда касалликлар тарқалишига қарши курашиш бўйича фавқулодда комиссия раиси ҳам ҳисобланувчи Тойлиев пандемияга қарши кураш бўйича амалга оширилаётган ишлар тўғрисида маълумот берган. Амалдорнинг сўзларига кўра, «ЖССТ ва ОАВ маълумотлари бўйича коронавируснинг янги штамми — омикрон аниқлангани сабаб мамлакатда ҳозирда профилактика чоралари кучайтирилган тартибга амалга оширилмоқда ва бу бўйича зарур қарорлар қабул қилинган».
Нашрнинг ёзишича, минтақада омикрон штамми аниқлангани сабаб «давлат раҳбари ушбу масалада бўшашиш керак эмаслигини алоҳида таъкидлаган».
«Ёз фаслининг бошланиши билан касалликнинг кучайиши эҳтимоли борлиги сабабли профилактика чораларини кўриш, зарур вакцина ва дори воситалари билан таъминлашни йўлга қўйиш керак», — деган президент.
Гурбангули Бердимуҳамедов, шунингдек, вакцинация мавзусига ҳам тўхталиб ўтган. «Ижобий натижа бериши учун у кишиларнинг ёшини ҳисобга олган ҳолда олиб борилиши ва унинг мазмун-моҳияти юзасидан мунтазам равишда тушунтириш ишлари олиб борилиши керак», — дейди президент.
Бундан ташқари, агросаноат тармоғини ривожлантиришга масъул бош вазир ўринбосари Эсенмират Оразгелдиев ва вилоят раҳбарлари агросаноат соҳасини ривожлантириш ҳамда озиқ-овқат мўллигини таъминлаш борасидаги ишлар юзасидан ҳисобот берган. Амалдорнинг маълумотларига кўра, 2022 йилда ижарачилар мамлакат бўйлаб 580 минг гектар ерга пахта экишни режалаштирмоқда, ҳозирда 244 минг гектардан ортиқ ер шудгор қилинган.
Бош вазир ўринбосари картошка ва полиз экинлари экиш ҳақида гапирар экан, «бу йил 50 450 минг гектарга кўпайган экин майдонларини 106 минг гектарга етказиш режалаштирилаётганини»ни билдирган.
Аввалроқ Туркманистонда Халқ маслаҳати палатасининг навбатдан ташқари йиғилиши ўтказилиши, Гурбангули Бердимуҳамедов Мари вилоятидаги чўпонлар қўтонига ташриф буюргани тўғрисида хабар берилганди.
Изоҳ (0)