Сўнгги ҳафтада дунё бўйлаб 15 миллиондан ортиқ одам COVID-19 билан касалланган, бу бутун пандемия учун рекорд кўрсаткичдир, дейилади Жаҳон соғлиқни сақлаш ташкилоти (ЖССТ)нинг ҳафталик ҳисоботида. Унда қайд этилишича, 3—9 январь ҳафтасида касалланишлар сони 55 фоизга ошган, ўлим даражаси деярли ўзгаришсиз қолган.
ЖССТнинг олтита ҳудудидан бештаси касалланишлар сонининг ортгани тўғрисида хабар қилган, фақатгина Африкада 11 фоизга пасайиш қайд этилган. Ўтган ҳафта янги юқтириш ҳолатларининг энг катта ўсиши Жануби-Шарқий Осиё минтақасида кузатилди — 418 фоиз, Ғарбий Тинч океани минтақасида эса бу кўрсаткич 122 фоизни ташкил этди.
Шу билан бирга, Африкада (84 фоизга) ва Америкада (26 фоизга) ўлим ҳолатлари сезиларли даражада ошган, Европада ўлим даражаси 10 фоизга, Жануби-Шарқий Осиёда 6 фоизга, Шарқий Ўрта Ер денгизида эса 11 фоизга камайган, дейилади ҳисоботда.
Бир ҳафта ичида ЖССТга дунё бўйлаб 15 154 666 нафар одамда коронавирус аниқлангани, 43 461 нафар бемор вафот этгани ҳақида хабарлар келиб тушди.
COVID-19 билан касалланиш ҳолатларининг ортиши кўп сонли мутацияларга эга ва янада юқумлироқ ҳисобланадиган омикрон штаммининг тарқалиши ортидан бошланди. Жумладан АҚШда 10 январь куни 1,35 миллион кишида коронавирус инфекцияси тасдиқланган. Бу бутун дунёда пандемия бошланганидан буён қайд этилган суткалик энг юқори кўрсаткич.
Шунингдек, АҚШда коронавирус билан шифохонага ётқизилган беморлар сони ҳам пандемия бошланганидан буён максимал кўрсаткичга чиққан. Мамлакат шифохоналарига тиббиёт ходимлари етишмаётгани туфайли ҳукумат коронавирус аниқланган, бироқ унинг енгил шаклини бошдан ўтказаётган тиббиёт ходимларига профессионал мажбуриятларини бажаришга рухсат берди.
Аввалроқ ЖССТ икки ой ичида Европа аҳолисининг ярми коронавируснинг омикрон штамми билан касалланишини прогноз қилган.
Изоҳ (0)