Turkmaniston prezidenti Gurbanguli Berdimuhamedov 10-yanvar kuni 2022-yildagi birinchi ishchi yig‘ilishini o‘tkazdi, deb xabar beradi “Xronika Turkmenistana”.
Ashxobod hokimi Rahim Gandimov poytaxt tozaligini saqlash va obodonlashtirish bo‘yicha, shuningdek, yoritish tizimining to‘g‘ri ishlashini ta’minlash bo‘yicha hisobot bergan. Qurilish, sanoat va energetika komplekslariga mas’ul bo‘lgan bosh vazir o‘rinbosari Chorimirat Purchekov shaharda uzluksiz energiya, gaz va suv ta’minotini ta’minlash bo‘yicha xizmatlar, shuningdek, 2022-yilga mo‘ljallangan turli obyektlarni qurishga tayyorgarlik ko‘rilayotgani haqida ma’lumot bergan.
Davlat rahbari shaharni loyihalash va yoritishda ilg‘or tajriba va eng yangi texnologiyalarni qo‘llash, 2022-yilda qurilishi rejalashtirilgan obyektlardagi ishlarni belgilangan muddatda yakunlash bo‘yicha topshiriqlar bergan.
Ta’kidlanishicha, Berdimuhamedov poytaxtni yoritish tizimi bo‘yicha 2021-yilning oktabrida O‘zbekistondan qaytganidan so‘ng ko‘proq e’tibor qarata boshlagan. Davlat rahbari Ashxobod aeroportida “aeroport va uning atrofini yoritishning o‘ziga xos xususiyatlari”ga e’tibor qaratgan va Purchekovga “shaharning har bir burchagini, xususan, turli maqsadlardagi obyektlar yoritish tizimlari bilan jihozlash” topshirig‘ini bergan, chunki “poytaxtning o‘ziga xos dizayn elementi tungi yorug‘lik bo‘lib, unga o'zgacha joziba bag‘ishlaydi”.
Ta’lim vaziri Gurbangul Atayeva maktablarga qishki ta’til yakunlanganidan keyingi mashg‘ulotlarga tayyorligini va maktab hamda bog‘chalar isitish tizimlari bilan ta’minlanganini ma’lum qilgan. Ikkinchi o‘quv yilini boshlashga tayyorgarlik to‘g‘risida, shuningdek, ilk-fan va ta’lim, sog‘liqni saqlash va sport yo‘nalishiga mas’ul bosh vazir o‘rinbosari Sapardurdi Toyliyev ham hisobot bergan.
Turkmanistonda kasalliklar tarqalishiga qarshi kurashish bo‘yicha favqulodda komissiya raisi ham hisoblanuvchi Toyliyev pandemiyaga qarshi kurash bo‘yicha amalga oshirilayotgan ishlar to‘g‘risida ma’lumot bergan. Amaldorning so‘zlariga ko‘ra, “JSST va OAV ma’lumotlari bo‘yicha koronavirusning yangi shtammi — omikron aniqlangani sabab mamlakatda hozirda profilaktika choralari kuchaytirilgan tartibga amalga oshirilmoqda va bu bo‘yicha zarur qarorlar qabul qilingan”.
Nashrning yozishicha, mintaqada omikron shtammi aniqlangani sabab “davlat rahbari ushbu masalada bo‘shashish kerak emasligini alohida ta’kidlagan”.
“Yoz faslining boshlanishi bilan kasallikning kuchayishi ehtimoli borligi sababli profilaktika choralarini ko‘rish, zarur vaksina va dori vositalari bilan ta’minlashni yo‘lga qo‘yish kerak”, — degan prezident.
Gurbanguli Berdimuhamedov, shuningdek, vaksinatsiya mavzusiga ham to‘xtalib o‘tgan. “Ijobiy natija berishi uchun u kishilarning yoshini hisobga olgan holda olib borilishi va uning mazmun-mohiyati yuzasidan muntazam ravishda tushuntirish ishlari olib borilishi kerak”, — deydi prezident.
Bundan tashqari, agrosanoat tarmog‘ini rivojlantirishga mas’ul bosh vazir o‘rinbosari Esenmirat Orazgeldiyev va viloyat rahbarlari agrosanoat sohasini rivojlantirish hamda oziq-ovqat mo‘lligini ta’minlash borasidagi ishlar yuzasidan hisobot bergan. Amaldorning ma’lumotlariga ko‘ra, 2022-yilda ijarachilar mamlakat bo‘ylab 580 ming gektar yerga paxta ekishni rejalashtirmoqda, hozirda 244 ming gektardan ortiq yer shudgor qilingan.
Bosh vazir o‘rinbosari kartoshka va poliz ekinlari ekish haqida gapirar ekan, “bu yil 50 450 ming gektarga ko‘paygan ekin maydonlarini 106 ming gektarga yetkazish rejalashtirilayotganini”ni bildirgan.
Avvalroq Turkmanistonda Xalq maslahati palatasining navbatdan tashqari yig‘ilishi o‘tkazilishi, Gurbanguli Berdimuhamedov Mari viloyatidagi cho‘ponlar qo‘toniga tashrif buyurgani to‘g‘risida xabar berilgandi.
Izoh (0)