Франция жануби-ғарбида кучли ёмғирлар оқибатида катта сув тошқинлари кузатилди, табиий офат оқибатида бир нафар аёл ҳалок бўлган. Бу ҳақда The Local хабар берди.
Юқори Гаронна ва Арежда 2 кун ичида бир ойлик меъёрдаги ёғингарчилик кузатилди ва Гаронна дарёси қирғоқларидан тошди.
Тулузада дарёдаги сув сатҳи 4 метр 31 сантиметрни ташкил қилган ва бу меъёрий даражадан анча баланд. 70 ёшли аёл Тулуза ғарбидаги Мервил яқинидаги уйи олдида сувга чўкиб, ҳалок бўлган.
Тулуза яқинидаги бир нечта коммуналарда мактаблар ёпилган ва мактаб автобусларининг ҳаракати бекор қилинган.
Тулузадаги метро бекатларидан бири сув тошқинлари туфайли ёпилган. Тулуза атрофидаги ва Лурд шаҳрига элтувчи йўллар тўлиқ сув остида қолган.
Юзлаб одамлар Тулузанинг Ил-де-Раме оролидаги талабалар ётоқхоналарига эвакуация қилинган ва уларнинг кўпчилик қисми спорт залларида тунаган.
Аввалроқ Фижида Cody циклони туфайли катта сув тошқинлари кузатилгани, Эронда йирик сув тошқинлари оқибатида 8 киши ҳалок бўлгани, Бразилияда сув тошқинлари туфайли 100 та шаҳарда фавқулодда ҳолат эълон қилингани, Малайзияда йирик сув тошқинлари юз бериб, 25 мингдан ортиқ одам эвакуация қилингани ҳақида хабарлар берилган.
Изоҳ (0)