Беларусь Тергов қўмитаси Минскка мажбурий қўндирилган Рйнаир самолётининг учувчиси ва диспетчер ўртасидаги суҳбат аудиоёзувини монтаж деб атади

Минск аэропорти диспетчери ва ичида Nexta Telegram каналининг (Беларусда экстремистик деб тан олинган) собиқ бош муҳаррири Роман Протасевич бўлган Ryanair самолётининг учувчиси ўртасидаги суҳбат аудиоёзувида монтаж белгилари мавжуд. Бу ҳақда «ОНТ» телеканали фильмида Минск бўйича Тергов қўмитаси бўлими бошлиғининг ўринбосари Андрей Мотолко айтиб ўтди.

Ушбу аудиоёзувни декабрь ойида Польша махсус хизматлари вазир-координаторининг матбуот котиби Станислав Жарин эълон қилганди. Мотолконинг сўзларига кўра, Беларусда аудио фоноскопик текширувдан ўтказилган. Мутахассислар «аудиода илгари ёзиб олинган бир нечта фонограммаларни бирлаштиришга хос монтаж белгилари бор», деган хулосага келди, дея таъкидлаган Тергов қўмитаси вакили. Бу эса аудиоёзувнинг ўзгартирилгани ва унга рақамли ишлов берилганини англатади, дейди у.

Варшава томонидан тақдим этилган аудиоёзувда диспетчер ва учувчи инглиз тилида гаплашаётганини эшитиш мумкин, аммо суҳбат пайтида Минск аэропорти ходимига орқадан кимдир рус тилида маслаҳат беради. Диспетчер самолёт командирига ундаги маълумотларга кўра, самолёт бортида бомба борлигини айтиб, учувчига Минскка қўнишни тавсия қилади.

Варшава баёнотига кўра, самолёт учувчиси билан боғланиб, унга бомба ҳақида ёлғон хабар берган авиадиспетчерга бундай кўрсатма Беларусь КГБ ходими томонидан берилган. Бироқ «ОНТ» канали диспетчер маслаҳатлашган шахс Минск ҳудудий диспетчерлик марказининг парвозлар бўлими бошлиғи Евгений Сйганов бўлганини даъво қилмоқда.

«Бу менинг овозим. Экипаж жуда кўп маълумот сўради. Диспетчер буларни билмаслиги мумкин эди. Ўзимдаги ҳужжатлардан билиб суҳбатга аралашдим. Ва қарор қабул қилдим. Якуний қарор меники эди. Қарор қабул қилишда экипаж вазият қайси кодда эканини сўради. Мен қизилда эканини айтдим», — дейди Сйганов.

Беларусь транспорт вазирлиги авиация бошқармаси бошлиғи Артем Сикорский Польша томонидан эълон қилинган ёзувга изоҳ берар экан, Ryanair учувчисини кўрсатмаларни бузганликда айблади. Унинг сўзларига кўра, экипаж командири «қизил» кодни олганда самолётни энг яқин аэродромга, яъни Вильнюсга қўндириши керак эди, Минскка эмас. Шу билан бирга, аввалроқ Ryanair бомба ҳақидаги маълумотни самолётни айнан Минскка қўндириш бўйича кўрсатмалар берган Беларусь авиадиспетчерларидан олганини билдирган.

Эслатиб ўтамиз, 23 май куни Беларусь ҳукумати Ryanair авиакомпаниясининг Афинадан Вильнюсга учаётган самолётини бортда бомба бор деган хабар билан шошилинч равишда Минскка қўнишга мажбур қилганди. Самолёт йўловчилари орасида Роман Протасевич ҳам бор эди. Протасевич ва унинг севгилиси — Россия фуқароси Софя Сапега аэропортда қўлга олинган. Беларусда «Nexta» собиқ бош муҳаррири тартибсизликлар уюштирганликда айбланган.

25 июнга қадар Протасевич ва Сапега қамоқда эди, аммо кейин улар тергов билан келишувга эришиб уй қамоғига ўтказилди. 8 декабрь куни Сапегага ижтимоий адоват ва нифоқ қўзғатиш, ахборот хавфсизлигига қарши жиноят, шахсий маълумотлар билан ишлаш қоидаларини бузиш ва ҳуқуқ-тартибот органлари ходимларига таҳдид қилиш моддалари бўйича якуний айблов қўйилди.

Аудиоёзув эълон қилинишидан олдин The New York Times манбаларига таяниб, берган хабарига кўра, самолётни Минскка фавқулодда қўндирган диспетчер буни Беларусь махсус хизмати томонидан уюштирилган операция деб айтган.