Билл Гейтс «омикрон»дан кейин коронавирус билан касалланиш камайишини прогноз қилди

Коронавируснинг «омикрон» штаммининг тарқалиши бутун дунёда COVID-19 билан касалланиш ҳолатларининг камайишига олиб келиши мумкин. Бу ҳақда Microsoft’нинг собиқ раҳбари Билл Гейтс ўзининг Twitter’даги саҳифаси орқали маълум қилди.

«Бирор-бир мамлакатда ‘омикрон’ штамми билан касалланиш ҳолатлари аниқланса, кейинги бир йил давомида касалланиш ҳолатларининг камайиши кузатилади ва коронавирусни мавсумий грипп каби даволаш мумкин бўлади», — деб ёзади у.

Гейтснинг фикрича, «омикрон» штамми сабаб кўпчиликда коронавирусга қарши иммунитет шаклланмоқда, бу эса камида 1 йилга етади.

Шу билан бирга, Гейтснинг маълум қилишича, мамлакатлар соғлиқни сақлаш тизимлари «омикрон» сабаб қийинчиликларга дуч келади. Унинг огоҳлантиришича, вакцинациядан ўтмаганлар аксарияти коронавируснинг оғир шакли билан касалланади.

«Янада юқумли штаммнинг пайдо бўлиш эҳтимоли кам, аммо пандемия даврида кўплаб сюрпризларга дуч келдик… Балки қанчадир вақт давомида ҳар йили коронавирусга қарши эмланишга мажбур бўлармиз», — дея қўшимча қилади у.

Коронавируснинг пайдо бўлиши тўғрисидаги саволга жавоб берар экан Гейтс у инсонларга бошқа биологи турган юққанини ёзган. Microsoft собиқ раҳбарининг сўзларига кўра, бу каби ҳолат келажакда ҳам кузатилиши мумкин, шу сабабли одамлар ўзини ҳимоялашга тайёр бўлиши керак.

2021 йилнинг сентябрь ўрталарида Гейтс инсоният ҳозиргидан «ўн баробар ёмонроқ» бўладиган янги пандемияга тайёрланиши кераклигини гапирганди. Унинг сўзларига кўра, 100 кун ичида вакцина тайёрлашни ўрганиб олиш, шунингдек, унинг жаҳон истеъмолини қоплашга имкон берадиган ишлаб чиқариш қувватларига эга бўлиш керак.

«Кейинги пандемияни тўхтатиш учун йилига ўнлаб миллиард доллар сарфлаш талаб этилади — кўпроқ инвестиция, аммо ёдда тутинг, COVID-19 пандемияси ҳисоб-китобларга кўра, бутун дунёга 28 триллион долларга тушади. Дунё триллионлаб долларни сақлаб қолиши (ва миллионлаб ўлимларнинг олдини олиши) учун миллиардлар сарфлаши керак», — деб ёзганди миллиардер январь ойида.

Шу билан бирга, Гейтс уни коронавирусни яратиш ва Ер аҳолисини чиплаштиришда айблаган фитна назарияси тарафдорларига жавоб қайтарганди. «Нотўғри маълумотлар вакцинацияларга халақит беради, бунинг натижасида пандемия узоқроқ давом этади», — деганди бизнесмен.