Ижтимоий тармоқларда Сирдарё вилоятида 1 январь куни ўт ўчириш мосламаси портлатилгани акс этган фото ва видеолавҳалар тарқалди. Вилоят Ички ишлар бошқармаси ҳолат бўйича маълумот берди.
Қайд этилишича, ҳуқуқни муҳофаза қилувчи орган ходимлари тезкор қидирув, суриштирув ишлари олиб борган. Натижада қонунбузарликни содир этган шахс Сирдарё тумани «Дўстлик» маҳалласида яшовчи фуқаро (2003 йилда туғилган) экани аниқланган.
Фуқаро Маъмурий жавобгарлик тўғрисидаги кодекснинг 183-моддаси (майда безорилик) ва 185-2-моддаси (совуқ қуролни ёки совуқ қурол сифатида фойдаланилиши мумкин бўлган ашёларни олиб юриш) билан айбли деб топилган. Унга нисбатан 15 сутка қамоқ жазоси тайинланган.
Эслатиб ўтамиз, Тошкент шаҳрида ҳам фуқаролар Янги йилни нишонлаш мақсадида қўлбола «огнетушитель» портлатганди. Ҳолатни видеога олаётган 3 киши жароҳатланган. Шаҳар Ички ишлар бош бошқармаси ҳолат бўйича 4 кишига нисбатан жиноят иши қўзғатилганини маълум қилган.
Аввалроқ Ўзбекистонда пиротехника буюмлари муомаласи соҳасида давлат назорати кучайтирилиб, бир ойдан кўпроқ вақт давомида 2,1 миллиард сўмлик қарийб 6 млн дона пиротехника воситалари мусодара қилинганди.
Изоҳ (0)