Тошкент вилоятининг Нурафшон шаҳри марказида жойлашган банкоматлардан бирида пул ўғирлаган шахслар қўлга олинди, деб хабар беради вилояти ИИББ ахборот хизмати.
Маълум қилинишича, 2021 йилнинг 11 декабрь куни тунги соат 02:30 ларда бир гуруҳ номаълум шахс (юзига ниқоб ва қўлига қўлқоп кийган ҳолда темир мослама билан қуролланиб) Нурафшон шаҳар марказида ўрнатилган «Poytaxtbank» АЖга қарашли банкоматларнинг бирига ҳужум қилган. Улар кодли сейфни бузиш орқали банкомат ичидан жами 19 миллион 433 минг сўм миқдоридаги пулларни олиб (банкомат ичида яна 180 миллион сўм пул бўлган), воқеа жойидан яширинган.
Ҳолат юзасидан Нурафшон шаҳар ИИБ ходимлари томонидан олиб борилган тезкор-қидирув тадбири давомида ушбу жиноятни – Ўрта Чирчиқ, Бектемир туманлари ҳамда Нурафшон шаҳрида яшовчи 22-24 ёш орасидаги 5 нафар шахс содир қилгани аниқланиб, улар Жиноят-процессуал кодексининг 221-моддаси (ушлаб туриш асослари) тартибида ушланган.
Суриштирув давомида ушбу шахслар 13 декабрь куни ҳам шаҳар марказидаги озиқ-овқат дўконини олдига ўрнатилган Paynet тўлов терминалини бузиб, ичида бўлган пулни олмоқчи бўлгани, бироқ уларнинг бу ҳаракати натижа бермагани аниқланган.
Жиноятни содир этган шахслар томонидан фойдаланилган буюм ва далилий ашёлар белгиланган тартибда олиниб, Нурафшон шаҳар ИИБ Тергов бўлими томонидан ушланган шахсларга нисбатан Жиноят кодексининг 25- (жиноятга тайёргарлик кўриш ва жиноят содир этишга суиқасд қилиш), 169-моддаси (ўғрилик) 3-қисми билан жиноят иши қўзғатилган.
Аввалроқ Тошкентда банкоматдан қарийб 400 млн сўм ўғирлаган бир гуруҳ шахслар қўлга олингани, Тошкентнинг «Авиасозлар» даҳасидаги банкоматлардан бирини бузиб, ичидан 165 миллион сўм ўғирлаган 24 ёшли шахс ушлангани ҳақида хабар берилган эди.
Изоҳ (0)