Самарқанд вилояти Каттақўрғон шаҳридаги ресторан омборхонасидан 8 миллион 400 минг сўмлик қурилиш молларини ўғирлаган шахс қўлга олинди. Бу ҳақида «Дарё»га Самарқанд вилояти Ички ишлар бошқармаси ахборот хизмати маълум қилди.
Хабар қилинишича, Каттақўрғон шаҳри Обод кўчасида яшовчи фуқаро ИИБга мурожаат қилган. У 2021 йил 27 декабридан 2022 йилнинг 3 январь кунигача бўлган вақт оралиғида номаълум шахс унинг қурилиши битмаган ресторани омборхонасидан таъмирлаш учун олиб келинган 22 дона қоғоз қутида бўлган 132 дона бўёқ солинган идиш ва 4 дона елим челакда бўлган травертин қурилиш материалини яширин равишда талон-торож қилиб воқеа жойидан яширинганини билдирган.
Каттақўрғон шаҳар ИИБ Жиноят қидирув бўлими ходимлари томонидан олиб борилган тезкор суриштирув ишлари давомида жиноят шаҳарнинг «Ғариб мачит» маҳалласи Алишер Навоий кўчасида яшовчи Х.С. (1980 йилда туғилган) томонидан содир қилингани аниқланган. Х.С. танишига сотган 34 дона бўёқ тегишли тартибда далилий ашё тариқасида расмийлаштириб олинган.
Мазкур ҳолат юзасидан Жиноят кодексининг 169-моддаси (ўғрилик) 3-қисми билан жиноят иши қўзғатилиб, тергов ҳаракатлари олиб борилмоқда.
Мазкур модда билан айбланган шахс беш йилдан саккиз йилгача озодликдан маҳрум қилиш билан жазоланади.
Мавзуга доир:
- Тошкентдаги 3 та масжидда фуқароларнинг телефони ва пулларини ўғирлаган хавфли рецидивист 7 йилга қамалди
- Наманганда қайнанасининг корхонасидан 40 млн сўмлик маҳсулотларни ўғирлашга уринган куёв ушланди
- Тошкентдаги дўконларда ўғрилик содир этиш билан шуғулланган аёл ушланди. Жиноятларга вояга етмаган қиз ҳам жалб этилган
Изоҳ (0)