Қашқадарё вилояти ҳокими Муроджон Азимовнинг оғзаки топшириғига биноан вилоят чегараларидаги йўл-патруль хизмати постларидан чигитни Самарқанд вилоятига олиб ўтиш тақиқлангани тўғрисида хабар берилганди. Вилоят ҳокимини қонунни бузишда айблаган Каттақўрғон шаҳри ҳокими Гавҳар Алимова талаби 10 кун муддатда бажариладиган бўлди. Бу ҳақда республикада фаолият юритувчи интернет нашрларига жавоб хати ёзган «Оқсарой кластер» МЧЖ директорига таяниб, «Дарё» мухбири хабар берди.
Маълум бўлишича, МЧЖ масъуллари республикада фаолият юритувчи интернет нашрлари ва блогерларга хат ёзиб, чигит можароси қандай якун топиши ҳақида маълумот берган. Қайд этилишича, Самарқандга юборилган ва йўлда ушлаб қолинган чигит уруғлик чигит бўлиб, шу сабабдан вилоятдан олиб чиқилишига йўл қўйилмаган.
«‘Оқсарой кластер’ МЧЖ масъул ходимларининг эътиборсизлиги натижасида бугунги кунда захирада сақланаётган 2022 йил пахта ҳосили учун экилиши режалаштирилган уруғлик чигити юклаб юборилган. ‘Оқсарой кластер’ МЧЖ томонидан ушбу хатоликка йўл қўйган масъул ходимларга нисбатан интизомий жазо чоралари кўрилган ҳолда келиб чиққан камчиликларни бартараф этиш мақсадида чигит юкланган юк автомашиналарини ‘Умакай’ мунтазам йўл-патруль масканида маълум муддатга тўхтатиб туриш тўғрисида хабар қилинди», — дейилади кластер корхонанинг интернет нашрларига йўлланган хатида.
Кластернинг қўшимча қилишича, кластер захира уруғлик чигитини қайтариб олиб, Самарқанддаги «Маroqand gold oil ekstraksiya» МЧЖ ёғ корхонасига 10 кун муддатда биржа савдолари орқали ютиб олинган техник чигитни етказиб беради. Шунингдек, юзага келган барча харажатларни ўз ҳисобидан қоплайди.
Эслатиб ўтамиз, 2 январь куни Самарқанд вилояти Каттақўрғон шаҳри ҳокими, сенатор Гавҳар Алимова шаҳарда қарийб 100 та иш ўрни яратган «Маroqand gold oil ekstraksiya» корхонаси муаммога дуч келганини ёзганди. 28 декабрь куни компания раҳбари Сайдин Рўзиев шаҳар ҳокимиятига келиб, товар ва хом ашё биржасидан очиқ савдолар асосида сотиб олинган 100 тонна чигит маҳсулотини Қашқадарёдан Самарқандга олиб кела олмаётганини маълум қилган. Қашқадарё вилояти ҳокимлигига кўра, чигит ортилган юк машиналари «QR-кодли ҳисобварақ-фактураси бўлмагани» сабабли тўхтатиб қўйилган.
Изоҳ (0)