Хитой ҳукумати 1,2 миллион аҳолига эга Ючжоу шаҳрини локдаунга ёпди, у ерда 3 кишида коронавирус аниқланган, деб ёзади Reuters.
Пекиндан 700 километр жануби-ғарбда жойлашган Ючжоу шаҳри аҳолисига шаҳардан ташқарига чиқмаслик буюрилган. Шаҳарнинг турли қисмларида ўрнатилган қоидалар бир-биридан фарқ қилади: баъзи ҳудудлар одамларга киришга рухсат беради, лекин чиқиш тақиқланади, бошқаларида эса иккаласига ҳам рухсат берилмайди.
Ючжоуда жамоат транспорти ҳам тўхтатилган, фақат фавқулодда ёрдам машиналари ҳаракатланиши мумкин. Барча дўконлар, кўнгилочар ва дам олиш масканлари ёпиқ. Маълум қилинишича, «кундалик эҳтиёж учун маҳсулотлар етказиб берилишини кафолатлайдиган» корхоналаргина фаолиятини давом эттириши мумкин.
«Вирус манбаси ҳозирча номаълум, касалланишлар сони ҳам ноаниқ. Шаҳримизда вирусларни назорат қилиш ва олдини олиш билан боғлиқ вазият жуда мураккаб», — дейилади Ючжоу устидан юрисдиксияга эга бўлган Сючан шаҳри ҳокимиятининг баёнотида.
Эслатиб ўтамиз, бутун Хитойда февраль ойида бўлиб ўтадиган қишки Олимпиада ўйинлари олдидан вирусга нисбатан «нол бардошлик» стратегияси амал қилмоқда. Агар бирор шаҳарда вирусга чалинган кишилар қайд этилса, у ерда дарҳол қатъий карантин жорий этилади.
Эслатиб ўтамиз, Ючжоу мамлакатдаги локдаун эълон қилинган иккинчи шаҳар бўлиб, дастлаб 13 миллион аҳолига эга Сиан шаҳри локдаунга ёпилганди.
Ноябрь ойида Хитойда коронавирус тарқалишининг янги ўсиши қайд этилганди. Жонс Ҳопкинс университети маълумотларига кўра, пандемия бошланганидан буён Хитойда 115 701 кишида коронавирус аниқланган, 4849 киши вафот этган.
Изоҳ (0)