Германиянинг Mercedes автомобиль ишлаб чиқарувчи компанияси носозлик туфайли дунё бўйлаб 800 мингдан ортиқ автомобилини чақириб олмоқчи. Бу ҳақда Bild нашри хабар берди.
Нашр компания мижозларига декабрь ойида юборилган хатни чоп этди. Унда қайд этилишича, автомобилларнинг совитиш суюқлиги насосида потенциал носозлик бўлиши мумкин. Муайян шароитларда, баъзи ҳолларда «ёнғинни бутунлай истисно қилиб бўлмайди» дейилади хатда.
Асосий муаммо шундаки, тегишли транспорт воситаларининг эгалари коронавирус пандемияси фонида эҳтиёт қисмлари етишмаслиги сабабли техник кўрикдан ўтказиш вақтини ҳозирча белгилай олмаяпти, дейилади Bild хабарида.
Нашрнинг ёзишича, оммавий чақириб олиш GLC, GLЕ, GLS дизель моделларига, шунингдек 2017 йилнинг январь-октябрь ойларида ишлаб чиқарилган C, E ва S синфларига тааллуқлидир.
Mercedes 2021 йилнинг март ойида ҳам машиналарда ёнғинга сабаб бўлиши мумкин бўлган носозлик борлиги туфайли 264 мингдан ортиқ автомобилни қайтариб олганди. Германия компанияси матбуот хизматининг аниқлик киритишича, гап 2016 йилдан 2020 йилгача ишлаб чиқарилган C ва GLC моделлари, жумладан, Германиянинг ўзида 120 мингдан ортиқ чиқарилган автомобиль ҳақида кетмоқда.
2021 йилнинг учинчи чорагида Германиянинг Daimler АG автомобиль ишлаб чиқарувчисининг (Mercedes-Benz бўлинмасини ўз ичига олади) фойдаси 18 фоизга ўсиб, 2,6 миллиард еврони ташкил қилди. Шу билан бирга, чорак давомида сотилган йўловчи ташувчи ва тижорий автомобиллар сони 25 фоизга камайиб, 577,8 мингтагача тушган.
Аввалроқ Tesla техник носозликларни тузатиш учун 475 минг дона электромобилини чақириб олиши хабар қилинганди. Хусусан, 2017–2020 йилларда ишлаб чиқарилган 356 минг дона Моdel 3 нинг барчаси, 2014 йилдан бери ишлаб чиқарилган 119 минг дона Model S автомобиллари қайтариб олинади.
Машиналардаги муаммолар қўшимча харажатларсиз ҳал қилинади, дейилган Tesla баёнотида.
Изоҳ (0)