Озарбайжон президенти Илҳом Алиев 2022 йилни мамлакатда «Шуша шаҳри йили» деб эълон қилиш тўғрисидаги фармойишни имзолади, деб хабар беради «ТАСС».
«Шуша шаҳрининг Озарбайжон халқи учун тарихий аҳамияти, юксак маданий-маънавий қадриятини ҳисобга олган ҳолда қарор қиламан: Озарбайжонда 2022 йил Шуша шаҳри йили деб эълон қилинсин», — дейилади ҳужжатда.
Фармойишда қайд этилишича, Шуша шаҳрига 1752 йилда Қорабоғ хони Панахалихон томонидан асос солинган ва у жорий йилда ўзининг 270 йиллигини нишонлайди. Шаҳар «узоқ ривожланиш йўлини босиб ўтган ва бутун Жанубий Кавказнинг маданий ҳамда ижтимоий-сиёсий ҳаётида алоҳида рол ўйнаган». Таъкидланишича, 2020 йилнинг кузида Қорабоғда амалга оширилган жанговар ҳаракатлар натижасида шаҳар Озарбайжон назорати остига ўтгач, у ерда инфратузилмани қуриш, тарихий ва маданий ёдгорликларни қайта тиклаш бошланган.
Маълумот учун, Тоғли Қорабоғдаги Шуша шаҳри 2020 йил ноябрида Озарбайжон назорати остига ўтди. Арманистон кучлари томонидан шаҳарнинг қўлдан берилиши кузда авж олган можаронинг сўнгги воқеаларидан бири бўлди. Шуша стратегик мавқега эга шаҳар бўлиб, Тоғли Қорабоғ пойтахти Степанакертдан 10 километр жанубда жойлашган. Степанакертни Арманистон билан боғловчи йўл мазкур шаҳардан ўтади. 90 йилларнинг бошида кечган Қорабоғдаги биринчи уруш пайтида шаҳар жиддий зарар кўрган. Ҳозирги кунда Шуша аҳолиси 4 минг кишидан сал кўпроқ.
Шуша вайрон қилинганидан сўнг дарҳол Москва воситачилигида Ереван ва Боку можарони тўхтатиш тўғрисида келишувга эришди. Унга мувофиқ Тоғли Қорабоғнинг муҳим қисми Озарбайжон ҳарбийлари назорати остига ўтди ва тинчлик шартномасига риоя этилишини назорат қилиш Россия тинчликпарвар кучларига топширилди.
Изоҳ (0)