КХДР Япон денгизи томонга номаълум снарядни учирди. Бу ҳақда Жанубий Корея Бирлашган штаб бошлиқлари қўмитасига таяниб, Yonhap агентлиги хабар берди.
Kyodo агентлигининг Япония ҳукуматига таяниб ёзишича, снаряд баллистик ракета бўлиши мумкин. Мамлакат Соҳил хизмати маълумотларига кўра, снаряд Тошкент вақти билан соат 04:23 да қулаган.
NHK телеканалининг маълум қилишича, Япония бош вазири Фумио Кисида снаряднинг учирилиши бўйича керакли маълумотларни тўплаш бўйича топшириқ берган ва «батафсил тезкор таҳлил» ўтказилишини билдирган. У «КХДР ўтган йилдан бошлаб мунтазам ракеталар учираётганидан» афсусда эканини маълум қилган.
Жанубий Кореянинг юқори мартабали шахслар фавқулодда ҳолатда Миллий хавфсизлик кенгаши йиғилишини ўтказиб, Шимолий Корея билан диалогни қайта тиклаш муҳимлигини таъкидлаган.
«Йиғилишда Миллий хавфсизлик кенгаши аъзолари ички ва халқаро барқарорлик фавқулодда ҳолатда бўлган вақтда ракетанинг учирилишидан хавотирда эканликларини билдирган… Кореялараро муносабатлардаги кескинлик ва турғунликни камайтириш учун Шимолий Корея билан мулоқотни қайта тиклаш муҳимлиги таъкидланди», — дейилади хабарда.
Япония ҳукуматининг бош котиби Хирокадзу Мацуно ўз навбатида КХДР томонидан ракеталар учирилиши бутун минтақа учун хавф туғдиришини маълум қилган. «Бу мамлакатимиз ва бутун минтақа хавфсизлиги ва тинчлигига таҳдид солади, шунингдек, бутун жаҳон ҳамжамиятининг жиддий муаммоси ҳисобланади», — деди у.
Аввалроқ АҚШ КХДР томонидан баллистик ракеталарнинг ишлаб чиқарилиши минтақадаги вазиятни беқарорлаштиришини маълум қилгани, Жанубий Корея Ким Чен Иннинг Кореялараро уруш тугагани ҳақидаги декларацияни тилга олишини юқори баҳолагани, АҚШ КХДРга нисбатан душманлик нияти йўқлигини маълум қилгани, Шимолий Корея сувости кемаси учун мўлжалланган баллистик ракетани синаган бўлиши мумкинлиги ҳақида хабар берилганди.
Изоҳ (0)