Жиноят ишлари бўйича Марҳамат туман суди томонидан онаси билан тортишиб, унга бақирган укасини пичоқлаган акага нисбатан суд ҳукми ўқилди. Бу ҳақда Андижон вилоят суди ахборот хизмати «Дарё»га маълум қилди.
Маълум бўлишича, Марҳамат туманида яшовчи Ф.М.ўзига тегишли Matiz автомобилида киракашлик қилиб келган. 2021 йилнинг 30 июль куни Ф.М. эрталаб онасининг тоби бўлмагани учун уни шифокорга кўрсатиб қайтиб, ишга чиқиб кетган.
Ўша куни кечга яқин ишдан уйга қайтган ўғил онаси, укалари, турмуш ўртоғи ва қизи билан кўришиб, чарчоқ чиқариш ва овқатланиш мақсадида алоҳида хонага кирган ҳамда спиртли ичимлик истеъмол қилган. Шу пайтда укаси З. маст ҳолатда онаси билан тортишиб кетганини эшитган Ф.М. ташқарига чиқиб, уларни тинчлантиришга уринган.
У онасининг бетоблиги учун алжирашда давом этган укасини қаршилик кўрсатишига қарамасдан уйига жўнатиб юборган. Шундай бўлса-да, соат 22:00 ларда З. яна қайтиб келган, бақир-чақир қилган. Онаси уйдаги мол билан овуниб юрганини айтишига қарамасдан, молни сотиб юборишини билдириб, жанжал кўтарган ва ойналарни синдирган. Бундан ғазабланган Ф.М.укаси билан ёқалашиб, уни 3-4 қоп буғдой турган жойга итариб юборган. Мувозанатини йўқотган З. тик турган пичоққа йиқилган. Пичоқ унинг чап қўлтиқ тагига кирган.
Ака-укани ажратган яқинлари З.ни зудлик билан шифохонага олиб борган, бироқ кўп қон йўқотган ука кўрсатилган тиббий ёрдамларга қарамасдан, шифохонада вафот этган.
«Мен атай қилмадим. Танбеҳ бериш мақсадида қўл кўтарди. Натижада ушбу бахтсиз ҳодиса юз берди. Ўзимга келганимда уйдагилар қўнғироқ қилишиб, укамнинг ўтиб қолганини, тайёргарлик кўриб, уйларни тозалаб қўйишимизни айтишди. Турмуш ўртоғи билан уйларни йиғиштириб, қон оққан жойларни тозалаб, пичоқни ювиб қўйдик. Мен уни қасддан ўлдирмадим. Шундай бўлса-да укамнинг ўлимига сабабчи бўлиб қолганимдан афсусдаман. Онамдан, келиним ва жиянларимдан кечиришларини сўрайман», — дейди судланувчи.
Суд ишини кўриб чиққан судья фуқаро Ф.М.ни Жиноят кодексининг 97-моддаси (қасддан одам ўлдириш) 1-қисмида назарда тутилган жиноятни содир этганликда айбли деб топган ҳамда унга нисбатан 10 йил муддатга озодликдан маҳрум қилиш жазосини тайинлаган.
Аввалроқ Тошкент вилоятида уч талоқ қўйган хотинини дўстига никоҳлаб, уларни пичоқлаган эркакка ҳукм ўқилгани, Қашқадарёда ўз укасининг оёқ-қўлларини сим билан боғлаб, тириклайин ёқиб юборган ака ушлангани, Қашқадарёда ҳомиладор хотини, қайнанаси ва икки нафар болани пичоқлаб ўлдирган эркак умрбод қамоқ жазосига ҳукм қилингани тўғрисида хабар берилганди.
Изоҳ (0)