Qashqadaryoda erini pichoqlab, o‘ldirib qo‘ygan ayolga nisbatan jinoyat ishi qo‘zg‘atildi. Bu haqda viloyat IIB axborot xizmati xabar berdi.

Ma’lum qilinishicha, 5-dekabr kuni soat 18:00 larda Koson tumani “Qorabayir” MFYda yashovchi E.J. mast holatda turmush o‘rtog‘i M.X.ni haqoratlab, urib-tepib, uni bo‘g‘gan. Ayol erining qo‘lidan chiqishga uringan, biroq kuchi yetmagani sabab supadagi savat ustida turgan oshxona pichog‘ini olib, turmush o‘rtog‘ining chap qo‘ltiq osti sohasiga bir marta sanchib olgan.

Oqibatda erkak olgan og‘ir tan jarohati tufayli vafot etgan.

Mudhish hodisa sodir bo‘lgan mahallada er-xotinning janjali oqibatida yuzaga kelgan jinoyat muhokamasiga bag‘ishlangan yig‘ilish bo‘lib o‘tgan. Unda viloyat IIB boshlig‘i, tuman hokimligi, tuman Ichki ishlar boshqarmasi, 2-sektor ishchi guruhi hamda oila va mahallani qo‘llab-quvvatlash tuman bo‘limi hamda mahalla faollari va marhumning yaqin qarindoshlari ishtirok etgan.

Yig‘ilishda sodir etilgan jinoyatni yuzaga keltiruvchi shart-sharoitlar va omillar tahlil etilgan, marhumning spirtli ichimlikka ruju qo‘yishi, oilaviy munosabatlarga yengil-yelpi, turmush tashvishlariga yuzaki qaragani, mahalla faollari, profilaktika inspektori va qarindoshlar nega bu holatga panja orasidan qaragani tanqid ostiga olingan.

Hozirda mazkur holat yuzasidan tuman prokuraturasi tomonidan M.X.ga nisbatan jinoyat ishi qo‘zg‘atilib, tergov harakatlari olib borilmoqda.

Avvalroq Qashqadaryoda erkak ikkinchi xotinining 15 yoshli o‘g‘li tomonidan pichoqlab o‘ldirilgani, Farg‘onada xotini va 13 yoshli o‘g‘lini tayoq bilan urib o‘ldirgan erkak 22 yilga qamalgani to‘g‘risida xabar berilgandi.