Qashqadaryoda homilador xotini, qaynanasi va ikki nafar bolani pichoqlab o‘ldirgan erkak umrbod qamoq jazosiga hukm qilindi

Qashqadaryoning Yakkabog‘ tumanida xotini, qaynanasi va ikki nafar voyaga yetmagan bolani pichoqlab o‘ldirgan erkakka sud hukmi o‘qildi. Bu haqda viloyat Ichki ishlar boshqarmasi axborot xizmati xabar berdi.

Ma’lum qilinishicha, 2020-yilning 10-dekabrga o‘tar kechasi 30 yoshli erkak Yakkabog‘ tumanining “Eski Yakkabog‘” mahallasidagi qaynanasining uyiga 2 ta oshxona pichog‘i bilan kelgan. Uyga devor orqali oshib kirgan erkak avval homilador xotinini, so‘ng uning onasini pichoqlagan.

Jinoyatchi qaynananing baqirganidan uyg‘ongan 8 yoshli R.Sh. va 6 yoshli A.Sh.ga ham pichoq sanchgan. Shundan so‘ng fuqaro voqea joyidan yashiringan.

Jinoyat ishlari bo‘yicha Qashqadaryo viloyati sudida bo‘lib o‘tgan so‘nggi sud yig‘ilishida hukm o‘qildi. Unga ko‘ra, erkak Jinoyat kodeksining 97-moddasining (qasddan odam o‘ldirish) qator bandlari va 219-moddasining (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) 1-qismi bilan aybdor deb topilib, uzil-kesil umrbod ozodlikdan mahrum qilish jazosi tayinlandi. Jazoni maxsus tartibli koloniyalarda o‘tash belgilangan.

Avvalroq Qashqadaryoda mast erkak xotini va qaynsinglisini pichoqlagani, Yakkabog‘ tumanidagi zovurdan odam jasadi topilgani, Samarqandda xotini va uning jazmanini pichoqlab o‘ldirgan erkak qo‘lga olingani to‘g‘risida xabar berilgandi.