«Ҳаммомдан чиқмоқчи бўлиб турганимизда портлаш бўлди, кейин билсам, икки шеригим вафот этибди». Фарғонадаги портлашдан жабрланганлар воқеа ҳақида

Фарғона вилоятининг Учкўприк туманида 2021 йилнинг 31 декабрь куни ҳаммомдаги газ портлаши оқибатида уч киши вафот этгани ҳақида хабар берилган эди. «Дарё» мухбири ушбу ҳодисага гувоҳ бўлган фуқаролар ва масъуллар билан суҳбатлашиб, воқеа жойидан репортаж тайёрлади.

Маълум бўлишича, портлаш содир бўлган Учкўприк туманининг «Наврўз» МФЙ Қораянтоқ қишлоғидаги бинода умумий фойдаланишдаги ҳаммом, ошхона ҳамда чойхона фаолият кўрсатган. Бино табиий газ тармоғига уланган ва «Ҳудудий газ таъминоти» корхонасининг Бувайда тумани филиали томонидан газ билан таъминланган.

Фавқулодда вазиятлар бошқармаси маълумотига кўра, 31 декабрь куни, тахминан, соат 17:00 да ҳаммомда газ-ҳаво аралашмаси чақнаши юз бериб, бинонинг том қисми қулаб тушган. Ҳодиса оқибатида уч киши воқеа жойида ҳалок бўлган, тўрт нафар фуқаро турли даражада тан жароҳати олиб, шифохонага ётқизилган.

«2021 йилнинг 31 декабрь куни соат 17:00 ларда Учкўприк тумани Қораянтоқ қишлоғида жойлашган ҳаммомда газ-ҳаво аралашмаси чақнаши юзага келган. Чақнаш оқибатида ҳаммомнинг том қисми қулаб тушган. Воқеа жойига вилоят Фавқулодда вазиятлар бошқармасининг ёнғин-қутқарув гуруҳи зудлик билан жалб этилиб, тонгга қадар қидирув-қутқарув ишлари олиб борилди.

Ҳодиса оқибатида уч нафар фуқаро воқеа жойида вафот этган, тўрт киши турли даражадаги тан жароҳатлари билан туман шифохонасига жойлаштирилган. Ҳозирда фавқулодда вазиятлар, ички ишлар, соғлиқни сақлаш, прокуратура ва бошқа тегишли хизматлар ходимларидан иборат ишчи гуруҳ тузилиб, терговга қадар суриштирув ҳаракатлари олиб борилмоқда», — дейди вилоят Фавқулодда вазиятлар бошқармаси ахборот хизмати раҳбари Аҳлиддин Алижонов.

Портлаш оқибатида бинонинг томи ва деворлари қулаганини, эшик ва ромлари кўчиб тушганини, ойналари бутунлай синганини кўриш мумкин. Шу маҳаллада яшовчи Иминжон Раззоқовнинг айтишича, у портлаш овозини эшитган ва ҳаммом томондан тутун чиқаётганини кўриб, ҳодиса жойига биринчилардан бўлиб етиб келган. Ёрдам сўраб бақираётган бир кишини қутқарган ва бино ичкарисига йўл очиш учун махсус техникаларни олиб келишга кўмаклашган.

«Ҳодиса, адашмасам, соат 16:00 лар атрофида содир бўлди. Уйимизда меҳмонлар бор эди. Уларга овқат ташкиллаштириб, ҳовлида тургандим. Бирданига кучли овоз эшитилди ва ҳаммом томонда тутун кўринди. Шунда бу ерга қараб югуриб келдим. Ҳаммомнинг орқа тарафида бир йигит ёрдам сўраётганини кўриб, уни қутқаришга ҳаракат қилдим. Ҳаммомнинг томи тушиб кетган экан, қулаган плиталарни қўл билан олиш ва бино ичкарисига йўл очишнинг иложи бўлмади. Шунинг учун мен кран чақиргани кетдим. Қайтиб келиб, бир киши ҳалок бўлганини кўрдим», — дейди Иминжон Раззоқов.

Samsung махсус техникаси ҳайдовчиси Бекзод Қодировнинг маълум қилишича, у тунги соат икки яримгача бино ичкарисига йўл очиш ва қидирув-қутқарув ишларида фавқулодда вазиятлар бўлими ходимларига ёрдам берган.

«Қўшни қишлоқда яшайман, Samsung махсус техникам бор. Ҳаммомда шунақа иш бўлди, деб ёрдамга чақиришди. 17:30—18:00 ларда келдим. Бинонинг орқа томони қулаб тушган, ҳамма нарса сочилиб, майдаланиб кетган экан. Кечаси соат икки яримгача катта кранга ичкарига кириши учун йўл очиб бердик», — дейди Бекзод Қодиров.

Портлаш вақтида бино ичкарисида бўлган, тан жароҳати олиб, шифохонага ётқизилган беморлар билан суҳбатлашиш учун Учкўприк туман тиббиёт бирлашмасига бордик.

«Шошилинч тез тиббий ёрдам бўлимига 31 декабрь куни Қораянтоқ қишлоғида содир бўлган бахтсиз ҳодиса оқибатида жароҳатланган икки нафар фуқаро мурожаат қилди. Уларга биринчи тиббий ёрдамни кўрсатиб, бўлимга жойлаштирдик. Ҳозирда беморлар — Шукрулло Ўсаров ва Муроджон Абдулҳамидовнинг ҳолати яхши, уларда жиддий тан жароҳатлари йўқ. Қўл ва юз соҳаларида тилинган ва лат еган жойлари бор, шифокорлар назоратида белгиланган тиббий муолажаларни олишяпти. Икки-уч кунда уйларига кетишга рухсат берилади», — дейди Учкўприк тумани тиббиёт бирлашмаси шошилинч тез тиббий ёрдам бўлими травматолог-шифокори Баҳодир Эргашев.

Портлаш оқибатида жароҳатланган Муроджон Абдулҳамидовнинг айтишича, у 31 декабрь куни 15:30 да уч нафар таниши билан ҳаммомга борган. Икки шериги ҳодиса жойида вафот этган, ўзи эса енгил тан жароҳати олган.

«Ўша куни 15:30 ларда ўртоқларим билан ҳаммомга чўмилишга боргандик. Чўмилиб бўлиб, чиқмоқчи бўлиб турганимизда портлаш юз берди. Ҳушимдан кетиб, йиқилиб тушдим. Ўша ерда 5-10 дақиқа ётдим. Ўзимга келиб, ўрнимдан туриб, ташқарига югуриб чиқдим. Бошида нима бўлганини тушунмадим. Тезда одамлар тўпланди. Мен шифохонага келдим. Кейин билсам, мен билан бирга ҳаммомга борган икки шеригим вафот этибди. Худога шукур, ҳозир анча яхшиман. Қолган ўртоқларим ҳам яхши экан. Бир-икки кунда тузалиб, чиқиб кетамиз», — дейди Муроджон Абдулҳамидов.

Шукрулло Ўсаров ҳам ҳодиса юз берган вақтда ҳаммом ичида бўлган.

«31 декабрь куни соат 15:30—16:00 лар атрофида чўмилгани ҳаммомга бордим. У ерга кирдим, 10 дақиқача чўмилдим. Чўмилиб бўлиб, ташқарига чиқиб, кийинаётган пайтимда орқадан бир нарса гумбурлади. Ўшанда йиқилдим. Туриб қараганимда портлаш бўлганини билдим. Кейин ташқарига югуриб чиқдим. Ташқарига чиқиб қўлимдан қон кетаётганини кўрдим. Биринчи ёрдамни кўрсатиб, қўлимни билак қисмидан боғлаб, қонни тўхтатишга ҳаракат қилдим. Кейин ўзимнинг машинамда шифохонага келдим. Ҳаммомнинг мен кирган хонасида яна уч киши бор эди», — дейди Шукрулло Ўсаров.

Туман тиббиёт бирлашмаси шифокорларининг маълум қилишича, ҳозирда тан жароҳати олган уч нафар беморнинг ҳолати яхши, бир кишининг ҳолати эса ўрта оғир даражада, айни пайтда у жонлантириш бўлимида қолмоқда.