Жанубий Африка олимлари «омикрон» штаммидан ўлим даражаси ҳақидаги маълумотларни эълон қилди

Коронавируснинг «омикрон» штаммидан ўлим даражаси COVID-19 нинг аввалги тўлқинларига қараганда 75 фоиз пастроқ. Бу ҳақда Жанубий Африкадаги Юқумли касалликлар миллий институти ва Претория университети олимлари маълумотларига таяниб, The Telegraph газетаси хабар берди.

Олимлар янги штаммнинг тарқалиш ўчоғига айланган Гаутенг провинцияси Сване шаҳрида касалхонага ётқизилган беморларни кузатди. Уларнинг аниқлашича, «омикрон» штамми тўлқини даврида беморларнинг 4,5 фоизи вафот этган, аввалги тўлқинларда эса 21,3 фоиз ҳолларда ўлим кузатилган эди.

Олимларнинг фикрича, агар дунёнинг бошқа мамлакатларида ҳам шундай натижаларга эришилса, «касалланиш ва ўлим кўрсаткичларини тўлиқ ажратиш мумкин» бўлади, бу эса пандемия тугашини яқинлаштиради.

Бундан ташқари, тадқиқот давомида «омикрон» билан касалланганлар касалхонадан тезроқ – ётқизилганидан кейин ўртача тўрт кун ичида чиққани аниқланди. Аввалги тўлқинларда бу кўрсаткич 8,8 кун эди.

Касалликнинг интенсив терапияни талаб этадиган оғир шакли ҳам камроқ беморларда кузатилган —  1 фоиз, коронавируснинг олдинги тўлқинларида бу кўрсаткич 4,3 фоиз эди. Беморларнинг фақат учдан бирида пневмония ривожланган, бу гуруҳнинг 72 фоизида пневмония енгил ва ўртача оғирликда ўтган. «Омикрон» билан оғриган беморларнинг ярмидан камроғига (45 фоиз) кислород терапияси зарур бўлган, аввалги штаммларда эса бу кўрсаткич 99,5 фоизга етганди.

Тадқиқотда 14 ноябрдан кейин Преториядаги касалхонага ётқизилган 466 бемор иштирок этди. Олинган маълумотлар шу кунгача касалхонага ётқизилган 3976 нафар беморда касаллик қандай кечгани ҳақидаги маълумотлар билан таққосланди.

Жанубий Африка «омикрон» штамми билан касалланишнинг илк ҳолатлари қайд этилган мамлакатлардан бири бўлганди. Мамлакатда янги штамм 23 ноябрь куни 14—16 ноябрь кунлари касалланган беморлардан олинган намуналарда аниқланган.

Декабрь ойи бошида Жанубий Африка олимлари янги штамм коронавирусдан тузалганлар учун қайта касалланиш хавфини оширишини аниқлади. Кейинчалик маҳаллий шифокорлар янги вариант аввалгиларига қараганда юқумлироқ эканини, аммо у билан касалхонага ётқизилиш хавфи камроқлигини маълум қилди.

Жаҳон соғлиқни сақлаш ташкилоти маълумотларига кўра, «омикрон» 100 дан ортиқ мамлакатда топилган. У билан боғлиқ биринчи ўлим ҳолатлари Австралия, Германия, Исроил, АҚШ ва Буюк Британияда қайд этилган.