30 декабрга ўтар кечаси Грузия собиқ президенти Михаил Саакашвили жисмоний қаршилик кўрсатганига қарамай, мамлакат Мудофаа вазирлиги госпиталидан алоҳида маҳбуслар учун мўлжалланган Рустави шаҳридаги махсус ҳибсхонага кўчирилди. Бу ҳақда Саакашвилининг адвокатлари гуруҳига таяниб, «Коммерсантъ» хабар берди.
«Саакашвилини Горидан ўғирлаб кетишди», — деб ёзади собиқ пресидент даврида адлия вазири бўлган Гварамия ўзининг ижтимоий тармоқлардаги саҳифасига.
Михаил Саакашвили аъзо ҳисобланувчи «Ягона миллий ҳаракат» партияси депутати Эка Херхеулидзе журналистлар билан суҳбатда собиқ президентни «куч билан» қамоққа кўчиришганини маълум қилган. Шу билан бирга, унинг айтишича, госпитал ва Рустави томонга элтувчи бутун йўл «махсус кучлар билан тўла бўлган».
«Главний канал» мухолифат телекомпанияси тўғридан-тўғри эфирда автомобиллар колоннаси катта тезликда Рустави томон ҳаракатланаётгани тасвирланган кадрларни кўрсатган. Афтидан уларнинг бирида Михаил Саакашвили Жазони ижро этиш департаменти ходимлари билан бирга бўлган.
Таъкидланишича, 28 декабрга ўтар кечаси собиқ президенти Руставидаги қамоқхонага кўчиришмоқчи бўлган. Ҳарбий госпитал раҳбарияти даволаш курслари муваффақиятли якунланганини билдирган. Аммо ўшанда Саакашвилининг аҳволи палатадан чиқишда ёмонлашган, у ҳушини йўқотгани сабаб яна бир суткага госпиталда қолдирилган.
Эслатиб ўтамиз, 19 ноябрь куни 49 кундан бери очлик сақлаб келаётган Саакашвили адвокати билан учрашув вақтида йиқилиб тушиб, ҳушидан кетгани ҳақида хабар берилганди. Йиқилгач, у кўзини очмаган ва ҳеч нарсани сезмаган. Саакашвилини «носилка»да олиб кетишган. У қамоқхона шифохонасининг жонлантириш бўлимига ётқизилган. Кейинроқ Саакашвили Гори шаҳридаги ҳарбий госпиталга кўчирилган.
Саакашвилининг шахсий шифокори Николоз Кипшидзе Грузия собиқ президентининг аҳволи кескин ёмонлашганини маълум қилган. Шифокорнинг сўзларига кўра, организмдаги эндокринологик ва метаболик ўзгаришлар натижасида юзага келган тери сарғайиши аввалги кунларга нисбатан кучайган. Доктор Кипшидзе яқин кунларда бу ўзгаришлар тузатиб бўлмас ҳолга келишидан хавотирда эди.
Изоҳ (0)