Ироқ бош вазири Мустафо ал-Козимий АҚШ бошчилигидаги коалиция Ироқда жанговар миссиясини якунлаб, қўшинларни мамлакатда олиб чиқиб кетаётганини тасдиқлади. Бу ҳақда Sinhua агентлиги хабар берди.
Сиёсатчи, шунингдек, коалицияга миннатдорлик билдирган ва Ироқ Қуролли кучлари аҳолини ИШИД жангарилари хавфидан ҳимоя қилишга тайёрлигига ишонтирган.
«Халқаро коалициянинг жанговар миссияси якунланди ва бутун жанговар техникалар Ироқдан олиб чиқиб кетилди. Коалициянинг роли стратегик диалогга кўра, консультация ва қўллаб-қувватлов билан чекланди», — деб ёзади Козимий ўзининг Twitter’даги саҳифасига.
Эслатиб ўтамиз, 2020 йилнинг 5 январида Ироқ парламенти ҳукуматдан мамлакатда хориж кучларининг бўлишини тўхтатишни талаб қилувчи резолюцияни қабул қилганди. 2021 йилнинг июлида АҚШ ва Ироқ стратегик диалог ўтказиб, унинг доирасида Америка қўшинларини мамлакатда 31 декабргача олиб чиқиб кетишга келишиб олган эди.
Маълумот учун, АҚШ Ироққа 2003 йилда бостириб кирган, мамлакатда ҳукмронлик қилган диктатор Саддам Ҳусайннинг террорчилар билан эҳтимолий алоқаси бунинг учун расмий сабаб бўлиб хизмат қилган. Ҳусайн режими ағдарилганидан кейин Америка қўшинлари «Ал-Қоида» ва ИШИДга қарши маҳаллий операциялар ўтказиш билан шуғулланган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)