Koronavirusning “omikron” shtammidan o‘lim darajasi COVID-19 ning avvalgi to‘lqinlariga qaraganda 75 foiz pastroq. Bu haqda Janubiy Afrikadagi Yuqumli kasalliklar milliy instituti va Pretoriya universiteti olimlari ma’lumotlariga tayanib, The Telegraph gazetasi xabar berdi.
Olimlar yangi shtammning tarqalish o‘chog‘iga aylangan Gauteng provinsiyasi Svane shahrida kasalxonaga yotqizilgan bemorlarni kuzatdi. Ularning aniqlashicha, “omikron” shtammi to‘lqini davrida bemorlarning 4,5 foizi vafot etgan, avvalgi to‘lqinlarda esa 21,3 foiz hollarda o‘lim kuzatilgan edi.
Olimlarning fikricha, agar dunyoning boshqa mamlakatlarida ham shunday natijalarga erishilsa, “kasallanish va o‘lim ko‘rsatkichlarini to‘liq ajratish mumkin” bo‘ladi, bu esa pandemiya tugashini yaqinlashtiradi.
Bundan tashqari, tadqiqot davomida “omikron” bilan kasallanganlar kasalxonadan tezroq – yotqizilganidan keyin o‘rtacha to‘rt kun ichida chiqqani aniqlandi. Avvalgi to‘lqinlarda bu ko‘rsatkich 8,8 kun edi.
Kasallikning intensiv terapiyani talab etadigan og‘ir shakli ham kamroq bemorlarda kuzatilgan — 1 foiz, koronavirusning oldingi to‘lqinlarida bu ko‘rsatkich 4,3 foiz edi. Bemorlarning faqat uchdan birida pnevmoniya rivojlangan, bu guruhning 72 foizida pnevmoniya yengil va o‘rtacha og‘irlikda o‘tgan. “Omikron” bilan og‘rigan bemorlarning yarmidan kamrog‘iga (45 foiz) kislorod terapiyasi zarur bo‘lgan, avvalgi shtammlarda esa bu ko‘rsatkich 99,5 foizga yetgandi.
Tadqiqotda 14-noyabrdan keyin Pretoriyadagi kasalxonaga yotqizilgan 466 bemor ishtirok etdi. Olingan ma’lumotlar shu kungacha kasalxonaga yotqizilgan 3976 nafar bemorda kasallik qanday kechgani haqidagi ma’lumotlar bilan taqqoslandi.
Janubiy Afrika “omikron” shtammi bilan kasallanishning ilk holatlari qayd etilgan mamlakatlardan biri bo‘lgandi. Mamlakatda yangi shtamm 23-noyabr kuni 14—16-noyabr kunlari kasallangan bemorlardan olingan namunalarda aniqlangan.
Dekabr oyi boshida Janubiy Afrika olimlari yangi shtamm koronavirusdan tuzalganlar uchun qayta kasallanish xavfini oshirishini aniqladi. Keyinchalik mahalliy shifokorlar yangi variant avvalgilariga qaraganda yuqumliroq ekanini, ammo u bilan kasalxonaga yotqizilish xavfi kamroqligini ma’lum qildi.
Jahon sog‘liqni saqlash tashkiloti ma’lumotlariga ko‘ra, “omikron” 100 dan ortiq mamlakatda topilgan. U bilan bog‘liq birinchi o‘lim holatlari Avstraliya, Germaniya, Isroil, AQSh va Buyuk Britaniyada qayd etilgan.
Izoh (0)