Францияда Миллий соғлиқни сақлаш агентлиги ўтган бир сутка давомида мамлакатда 179 807 кишида коронавирус аниқланганини маълум қилди, деб хабар беради «Интерфакс». Бу мамлакатда пандемия бошланганидан буён қайд этилган энг юқори кўрсаткич ҳисобланади.
BFMTV телеканали ушбу рақамларнинг эълон қилиниши билан соғлиқни сақлаш вазири Олвие Веран ўтган ҳафта мамлакатда коронавирус билан кунлик касалланиш ҳолатлари 100 мингга етишини айтганини эслатиб ўтган. Бироқ сўнгги рақамлар прогнозлардан анча ўтиб кетган ва 25 декабрдаёқ бир сутка давомида 104 мингдан ортиқ одамда COVID-19 тасдиқланган эди.
ОАВ коронавирус биринчи навбатда эмланмаган аҳоли қатламига юқаётгани тўғрисидаги расмий маълумотларни келтирмоқда. Статистикага кўра, мамлакатда 12 ёшдан катта 5,3 миллион киши ҳали вакцинанинг биринчи дозасини ҳам олмаган, уларнинг 1 миллиондан ортиғи 65 ёшдан катта бўлган фуқаролардир.
Шу билан бирга, таъкидланишича, қўшимча, бустер эмлаш кампанияси муваффақиятли ўтаётгани айтилмоқда. 23 миллиондан ортиқ франзус вакцинанинг учинчи дозасини олган — бу етти ой олдин иккинчи инъекцияни олганларнинг 88 фоизи қамраб олинганини билдиради.
Аввалроқ дунё бўйлаб бир суткада рекорд даражада кўп одамда COVID-19 аниқлангани, Грецияда 2 ҳафталик кучайтирилган карантин эълон қилингани, Жанубий Кореяда COVID-19 билан кунлик касалланишлар сони янги антирекорд ўрнатгани тўғрисида хабар берилганди.
Изоҳ (0)