Украина президенти Владимир Зеленский мамлакатнинг ахборот хавфсизлиги стратегиясини тасдиқлади. Ушбу стратегия бошқа нарсалар қатори ахборот соҳасида Россияга қарши туришга қаратилган, деб хабар беради «ТАСС». Бу борадаги тегишли қарор давлат раҳбари офисининг расмий сайтида эълон қилинган.
«Ахборот хавфсизлиги тўғрисидаги стратегия тасдиқлансин», — дейилади қарор матнида. Ҳужжат эълон қилинган кунидан бошлаб кучга киради.
Стратегия ахборот соҳасидаги Украинанинг миллий хавфсизлигига таҳдид ва чақириқларни белгилайди, улар орасида Россиянинг ахборот сиёсати ҳам кўрсатилган.
15 сентябрь куни Украина ҳукумати президент томонидан 2020 йил сентябрида имзоланган миллий хавфсизлик стратегияси асосида ишлаб чиқилган ахборот хавфсизлиги стратегиясини тасдиқлаган. Унинг мақсади Украинада ахборот хавфсизлигини таъминлаш, ахборот соҳасидаги давлат хавфсизлигига таҳдидларга қарши курашиш, шахсларнинг маълумотларга бўлган ҳуқуқларини ҳимоя қилиш ва шахсий маълумотларни ҳимоя қилиш асосларини аниқлашдан иборат.
Стратегия Украинанинг конституциявий тузуми ва ҳудудий яхлитлигини ағдариш, унинг суверенитети ва демократик тизимига путур етказишга қаратилган ахборот тажовузкорлигини чеклаш орқали амалга оширилади.
Эслатиб ўтамиз, 2021 йилнинг август охирида Украина президенти Владимир Зеленский Миллий хавфсизлик ва мудофаа кенгаши (МХМК)нинг мамлакат кибермудофааси бўйича шошилинч чоралар тўғрисидаги қарорини кучга киритганди. Ҳужжатга мувофиқ, Зеленский ҳукуматга икки ой ичида Украина Мудофаа вазирлиги тизимида фаолият кўрсатадиган киберқўшинларни яратиш тўғрисидаги қонун лойиҳасини ишлаб чиқишни ва кўриб чиқиш учун Олий Радага киритишни буюрган.
Изоҳ (0)