27 декабрь, душанба куни бутун дунёда яна 1,44 миллиондан ортиқ кишида COVID-19 аниқланди. Жонс Ҳопкинс университети маълумотларига кўра, бу касалланиш бўйича янги жаҳон рекорди. Bloomberg ёзишича, душанба куни сўнгги етти кунлик касалланишларнинг ўртача даражаси ҳам рекорд бўлган — 841 минг атрофида. Бу бир ой олдин «омикрон» штамми биринчи марта Африка жанубида аниқланган вақтга нисбатан 49 фоизга юқори.
Шу билан бирга, сўнгги ойларда ўлим даражаси у қадар ошмаган. Етти кун давомида кузатилган ўлимларнинг ўртача даражаси, «омикрон» тарқалишига қарамай, октябрь ойининг ўрталаридан бери қайд этилаётган 7 мингта ҳолатида сақланиб қолган.
Bloomberg сўнгги тадқиқотларга таяниб маълум қилишича, «омикрон» аввалги штаммларга қараганда 70 марта тезроқ юқади, лекин у келтириб чиқарадиган касаллик, айниқса, одам коронавирусга қарши эмланган ёки бустер доза олган бўлса, енгилроқ ўтади. Ўлим кўрсаткичларининг ўсмаганига сабаб шунда, деб таъкидлайди газета.
Бироқ касалланиш даражасининг ошиши мамлакатлардаги соғлиқни сақлаш тизимларига ҳамон жиддий юк бўлиб қолмоқда, янги чекловларнинг жорий этилиши эса келгуси ҳафталарда ўлим даражасида қандай ўзгаришлар кузатилишига боғлиқ бўлади, дейилади хабарда.
Ўзбекистон Соғлиқни сақлаш вазирлигининг расмий маълумотларига кўра, 27 декабрь куни мамлакатда 100 нафар кишида коронавирус аниқланган. Бу 15 декабрдан буён энг паст кўрсаткич дейилади ССВ хабарида. Унга кўра, Ўзбекистонда COVID-19 га чалинганларнинг умумий сони 198487 нафарни ташкил этмоқда, касалликдан соғайганлар 195520 нафарга етган, соғайиш кўрсаткичи эса 98 фоизни ташкил этмоқда.
Шунингдек, ўтган суткада 3 нафар коронавирусга чалинган беморлар вафот этиб, касаллик қурбонлари сони 1484 кишига етди, дейилади Ўзбекистон ССВ хабарида.
Изоҳ (0)