Россия ва АҚШ 10 январь куни қуролланиш назорати ҳамда Украинадаги вазият бўйича музокаралар ўтказади. Бу ҳақда AFP агентлигига таяниб, «РБК» хабар берди.
«Қўшма Штатлар Россия билан ҳамкорликка умид қилади», — деган АҚШ Миллий хавфсизлик кенгаши вакили.
Унинг сўзларига кўра, 12 январь куни Россия — НАТО кенгашининг йиғилиши, эртаси куни эса Россия, Европада хавфсизлик ва ҳамкорлик ташкилоти (ЕХҲТ) вакиллари ўртасида музокаралар бўлиб ўтиши кутилмоқда.
Аввалроқ Россия ташқи ишлар вазири Сергей Лавров Москва Янги йил байрамларидан кейин Вашингтон билан хавфсизлик кафолатлари бўйича музокараларининг асосий раундини бошлашни режалаштираётганини маълум қилганди. Россия томонидан уларга вазирлар ва ҳарбийлардан иборат идоралараро делегация бошчилик қилади.
Вазирнинг сўзларига кўра, Россия АҚШга ҳеч қандай ультиматумларни қўймайди, бироқ «охири йўқ мунозаралар» ҳақида гап бўлиши мумкин эмас. Москва учун ушбу масала бўйича дипломатик саъй-ҳаракатлар муҳим, хусусан, «қандайдир маълум муддатга».
Декабрь ўрталарида Россия АҚШ ва НАТОга хавфсизлик кафолатлари бўйича шартномалар лойиҳаларини топширганди. Уларда НАТОнинг шарқ томон кенгаймаслиги, собиқ СССР давлатларининг иттифоқига қўшилмаслик ва Украина ҳудудида ҳарбий фаолиятни тақиқлаш каби бандлар мавжуд. Бундан ташқари, Москва Вашингтонга қуруқликдаги ўрта ва қисқа масофали ракеталарни миллий ҳудуддан ташқарида жойлаштиришдан бош тортиш тамойилига қайтишни ва ядро қуролини миллий ҳудуддан ташқарида жойлаштиришни чиқариб ташлашни таклиф қилган.
Эслатиб ўтамиз, 20 апрель куни Зеленский Путинга Украинанинг Донбассидаги уруш кетаётган исталган жойида учрашишни таклиф қилганди. Путин бунга жавобан агар Украина президенти Донбасс муаммосини муҳокама қилмоқчи бўлса, аввал у Донецк ва Луганск Халқ Республикаларининг раҳбарлари билан учрашиши кераклигини ва шундан кейингина учинчи томон сифатида Россия раҳбарияти билан учрашиши мумкинлигини айтган. Шунингдек, у Россия томонининг Украина билан икки мамлакат ўртасидаги муносабатлар ҳақида гаплашишга тайёрлигини билдирган ва Зеленскийни «ўзига қулай бўлган исталган вақтда» Москвага келишга таклиф қилган.
Изоҳ (0)