Греция ҳукумати коронавирус пандемияси туфайли жорий этилган карантин чекловларини икки ҳафтага кучайтиришга қарор қилди. Бу ҳақда The Guardian нашри хабар берди.

Нашр хабарига кўра, мамлакатда COVID-19 билан касалланиш ҳолатлари кўпайишининг олдини олиш мақсадида 3—16 январь кунлари, асосан, тунги кўнгилочар муассасаларга тааллуқли бўлган қўшимча чоралар кўрилади.

Хусусан, бу даврда бар ва ресторанлар узоғи ярим тунда ёпилиши керак, бир стол атрофида йиғиладиганларнинг максимал сони олти кишидан ошмаслиги зарур. Мамлакат Соғлиқни сақлаш вазирлиги қонунбузарликлар аниқланган тақдирда, бундай муассасаларда мусиқани тақиқлаш билан таҳдид қилмоқда.

Бундан ташқари, спорт тадбирларига киритилувчиларнинг сони 10 фоизгача чекланган, лекин 1000 кишидан ошмаслиги керак. Қарияларни парваришлаш муассасаларига ташриф буюрмоқчи бўлганларда 48 соат ичида олинган ПЗР-тести манфий натижа кўрсацагина, уларга кексаларни зиёрат қилишга рухсат берилади.

Шунингдек, ҳукумат аҳолини супермаркетлар, жамоат транспорти ва умумий овқатланиш корхоналарида юқори даражада ҳимояланган ниқобларни тақишга мажбурламоқда.

26 декабрь куни Грецияда коронавирусга чалинишнинг янги ҳолатлари ва унинг фонида пандемия бошланганидан бери ўлим ҳолатлари антирекорд ўрнатган – мос равишда 9284 ва 66 киши.

19 декабрдан бошлаб Греция ҳукумати сайёҳлар учун мамлакатга кириш қоидаларини кучайтирганди. Хусусан, ҳукумат барча сайёҳларга мамлакатга келганидан кейин 48 соат ичида коронавирус учун топширилган ПЗР-тестининг натижаларини тақдим этишни мажбурий қилди.

Аввалроқ Бангкокда коронавирус сабаб оммавий Янги йил тадбирларини ўтказиш бекор қилингани, Бельгияда «омикрон» штамми туфайли янги чекловлар амалга киритилгани, Нидерландияда локдаун эълон қилингани ҳақида хабарлар берилганди.