Беларусь президенти вафот этган тақдирда, мамлакатнинг давлат органлари Хавфсизлик кенгаши қарорларига мувофиқ ҳаракат қилади. Бу ҳақда республиканинг янги конституцияси лойиҳасида айтилган, деб ёзади «Интерфакс».
Янги конституция лойиҳасида «президент унинг ҳаётига суиқасд, террорчилик ҳаракати, ҳарбий босқин ёки бошқа зўравонлик ҳаракатлари натижасида вафот этган тақдирда» давлат органлари ва мансабдор шахслар Хавфсизлик кенгаши қарорларига мувофиқ ҳаракат қилиши қайд этилган.
Унда кўрсатилишича, бундай вазиятда Хавфсизлик кенгашининг йиғилишлари Республика кенгаши раиси раҳбарлигида ўтказилади. Бундан ташқари, президент вафот этган тақдирда Хавфсизлик кенгаши қарори асосида белгиланган тартибда мамлакат ҳудудида зудлик билан фавқулодда ёки ҳарбий ҳолат жорий этилади.
Шунингдек, лойиҳада президентнинг ўрни бўшаб қолган ёки конституцияда назарда тутилган асосларга кўра ўз вазифаларини бажариш имкони бўлмаган тақдирда, унинг ваколатлари янги сайланган президент қасамёд қилгунга қадар Республика кенгаши раисга ўтиши кўзда тутилган, дейилади хабарда.
Аввалроқ Беларусь президенти Александр Лукашенко бир-икки кундан кейин янги конституция лойиҳаси умумхалқ муҳокамасига тақдим этилишини айтганди. Лукашенконинг айтишича, конституция ўзгартириладиган бўлса, мамлакатдаги бошқарув тизими унга мувофиқ қайта қурилади.
Беларусда 2020 йил 9 августда бўлиб ўтган президентлик сайловларидан кейин бошланган норозилик намойишлари фонида Лукашенко конституцияга ўзгартириш киритиш зарурати ва президентлик ваколатларининг бир қисмини ҳокимиятнинг бошқа тармоқлари фойдасига қайта тақсимлашга тайёрлигини маълум қилган. Беларусда асосий қонуннинг янги таҳрири бўйича референдум 2022 йил февраль ойида бўлиб ўтиши хабар қилинганди.
Изоҳ (0)