Россияда Навальний штабининг собиқ раҳбарлари ҳибсга олинди

Россиянинг Томск шаҳар полицияси сиёсатчи Алексей Навальнийнинг маҳаллий штаби собиқ раҳбари, шаҳар кенгаши депутати Ксения Фадеевани ҳибсга олди. Бу ҳақда ТВ2 телеканали бир қанча манбаларга таяниб хабар берди.

Хабарга кўра, Москвадан келган Тергов қўмитаси ходимлари Фадееванинг уйида тинтув ўтказган. Аёлнинг ўзи Томск Тергов қўмитаси биносига келтирилган. Дастлабки маълумотларга кўра, Фадеева сўроқ учун Москвага олиб кетилади.

Шунингдек, Иркутскдаги Навальний маҳаллий штабининг собиқ раҳбари Захар Сарапулов ҳам тинтувдан сўнг Тергов қўмитасига олиб кетилган. Бу ҳақда Сарапулов асос солган «Иркутский инсайдер» нашрида хабар берилган.

Навальнийга тегишли икки штабнинг собиқ раҳбарлари нима сабабдан ҳибсга олингани ҳозирча номаълум.

Навальнийнинг минтақавий штаби собиқ раҳбари Леонид Волков Фадеева ва Сарапулов билан боғлана олмаётганини айтди. «Ҳозирда ҳуқуқий ёрдамни мувофиқлаштиришга ва улар билан боғланишга ҳаракат қиляпмиз», — деди у. Волковнинг таъкидлашича, Фадеева ва Сарапуловга Россияни тарк этиш таклиф қилинганида, улар буни қатъиян рад этганди.

Волковнинг қўшимча қилишича, у Навальнийнинг Барнаулдаги штаби собиқ координатори Вадим Останиннинг уйи тинтув қилингани ва ўзи ҳибсга олингани ҳақидаги маълумотларни текширмоқда.

Сентябрь ойида Россия Тергов қўмитаси Алексей Навальний ва унинг энг яқин тарафдорларига нисбатан «экстремистик жамоат» тузиш бўйича жиноий иш қўзғатган эди. Иш бўйича ҳибсга олинган биринчи шахс Навальнийнинг Уфа шаҳридаги штаби собиқ раҳбари Лилия Чанишева бўлганди.

Июнь ойида Москва шаҳар суди Алексей Навальнийнинг ҳудудий штаблари, Коррупцияга қарши кураш фонди (ККФ) ва Фуқаролар ҳуқуқларини ҳимоя қилиш фондини экстремистик ташкилотлар деб тан олганди.