Ғарбий Африканинг Буркина-Фасо давлати шимолида қуролли номаълум шахслар савдогарларга тегишли автомобиллар карвонига ҳужум қилди. Оқибатда 41 киши ҳалок бўлд, деб ёзади «Korrespondent.net».
Қайд этилишича, ҳужум Лорум провинциясида содир этилган. Ҳалок бўлганлар орасида савдогарларни ҳимоя қилган маҳаллий милиция раҳбари ҳам бор.
«Буркина-Фасо ҳукумати ушбу ваҳший ҳужумни кескин қоралади ва қурбонларнинг оилаларига ҳамдардлик билдирди», — дейилади хабарда.
Ҳозирча ҳеч бир ташкилот содир бўлган воқеа учун жавобгарликни ўз зиммасига олмаган.
Ноябрь ойида Буркина-Фасо шимолида жангарилар полиция постига ҳужум қилиб, 53 кишини ўлдирган эди. Воқеа муносабати билан биринчи округ командири ва Шимолий сектор гуруҳи командири ўз лавозимларидан озод этилган.
Декабрь бошида Малида жангарилар одамларни маҳаллий бозорга олиб кетаётган автобусни ўққа тутиши оқибатида 31 киши ҳалок бўлганди. Шунингдек, кўпчилик жароҳат олган ёки бедарак йўқолган.
Аввалроқ Нигерияда қуролли шахсларнинг масжидга қилган ҳужуми оқибатида 18 киши ҳалок бўлгани, Эфиопияда номаълум жангариларнинг қишлоққа ҳужуми натижасида 200 дан ортиқ одам вафот этгани ҳақида хабар берилганди.
Изоҳ (0)