Бразилия шимоли-шарқидаги Баия штатида кучли ёғингарчилик сабаб юзага келган сув тошқинларида 20 киши ҳалок бўлди, яна 358 киши жароҳатланди. Бу ҳақда 28 декабрь куни ҳудудий фуқаролик мудофааси бошқармасига таяниб, «Korrespondent.net» хабар берди.
Қайд этилишича, табиий офат жами 470 минг кишига зарар етказган. Штатдаги 116 та шаҳардан 100 тасида фавқулодда ҳолат эълон қилинган.
Тўхтовсиз ёғаётган ёмғир кўприклар ва ўнлаб уйларнинг қулашига, сув тошқинлари ва ҳали ҳисоб-китоб қилинмаган моддий зарарларга олиб келган.
Бразилия Миллий метеорология институти маълумотларига кўра, Баия штатининг жанубида ноябрь ойида бошланган кучли ёмғирлар январгача давом этади. Мараньян, Сеара ва Сан-Паулу штатлари талафот кўрган ҳудудларга ёрдам бериш учун қутқарувчиларни юборишини маълум қилган.
Аввалроқ штатда 35 мингдан ортиқ одам ўз уйларини тарк этишга мажбур бўлгани хабар қилинганди. Сув тошқинлари оқибатида камида 1000 та оила зарар кўрган. Бир нечта аҳоли пунктларида эвакуация ишлари амалга ошириляпти.
Эслатиб ўтамиз, декабрь ўрталарида Бразилияда юз берган сув тошқини туфайли 7 киши ҳалок бўлган, минглаб одамлар эвакуация қилинганди. Ўшанда Бразилия президенти ва Баия штати губернатори зарар кўрган ҳудудларга ташриф буюрган ва уларни қайта тиклаш учун молиявий ёрдам кўрсатишга ваъда берган эди.
Мавзуга доир:
- 2021 йилда дунё бўйлаб 10 та табиий офатдан етказилган зарар 170 миллиард доллардан ошди
- Жанубий Америкада сув тошқинлари: ўнлаб қурбонлар бор
- Малайзияда йирик сув тошқинлари юз берди. 25 мингдан ортиқ одам эвакуация қилинди (фото)
- Австралияда кучли сув тошқинида дарахтга илиниб қолган эркак 6 соат ичида хавфсиз жойга олиб ўтилди
Изоҳ (0)